ചീമേനി: വേനല്‍ ചൂടില്‍ നാട് വരളുമ്പോള്‍ ജലസംരക്ഷണ ബോധവല്‍ക്കരണവുമായി കുളിയാട് ഗവ. ഹൈസ്‌കൂളിലെയും കുണ്ട്യം എല്‍.പി സ്‌കൂളിലെയും  കുട്ടികള്‍ ജലസംരക്ഷണ യാത്ര നടത്തി. കൂളിയാട് സ്‌കൂളില്‍ കഴിഞ്ഞ ഒരു മാസമായി നീണ്ടു നിന്ന ജലസംരക്ഷണ ബോധവല്‍ക്കരണ പരിപാടിയുടെ ഭാഗമായാണ് കാക്കടവ് പുഴയിലേക്ക് പദയാത്ര നടത്തിയത്. പരിസ്ഥിതി കാലാവസ്ഥ വ്യതിയാന വകുപ്പുമായി സഹകരിച്ചാണ് വിവിധങ്ങളായ ജലസംരക്ഷണ ബോധവല്‍ക്കരണ പരിപാടി നടന്നത്. വിദ്യാര്‍ഥികള്‍ക്കു മാത്രമല്ല രക്ഷിതാക്കള്‍ക്കും ജലസംരക്ഷണത്തിന്റെ സന്ദേശം നല്‍കിയുള്ള ക്ലാസുകള്‍ നല്‍കി കഴിഞ്ഞു.
ഗൃഹസന്ദര്‍ശനവും ഇതോടൊപ്പം നടന്നു വരുന്നു. ക്ലബുകളും കുടുംബശ്രീയും കേന്ദ്രീകരിച്ച് ജലസംരക്ഷണവുമായി ബന്ധപ്പെട്ട ഡോക്യുമെന്ററികളുടെ പ്രദര്‍ശനവും ഇപ്പോള്‍ നടത്തുന്നുണ്ട്. വരണ്ടുണങ്ങിയ പുഴയെ നേരിട്ടറിയുകയായിരുന്നു പദയാത്രയുടെ ലക്ഷ്യം. പഞ്ചായത്ത് അംഗം സുഭാഷ് അറുകര പദയാത്ര ഉദ്ഘാടനം ചെയ്തു.