വടക്കാഞ്ചേരി: ഹയര്‍ സെക്കന്‍ഡറി വൊക്കേഷ്ണല്‍ ഹയര്‍ സെക്കന്‍ഡറി പരീക്ഷാ ഫലങ്ങള്‍ പ്രഖ്യാപിച്ചപ്പോള്‍ വടക്കാഞ്ചേരി മേഖലയിലെ സ്‌കൂളുകള്‍ക്കു മുന്‍വര്‍ഷത്തെ നേട്ടം നിലനിര്‍ത്താനായില്ല. എന്നാല്‍ നഗരഹൃദയത്തിലെ വടക്കാഞ്ചേരി ഗവണ്‍മെന്റ് ഹയര്‍ സെക്കന്ററി സ്‌കൂള്‍ ഇത്തവണ മിന്നുന്ന വിജയം നേടി.
179 വിദ്യാര്‍ഥികള്‍ പരീക്ഷയെഴുതിയപ്പോള്‍ 175 പേര്‍ വിജയം നേടി. 15 കുട്ടികള്‍ക്കു മുഴുവന്‍ വിഷയങ്ങളിലും എ പ്ലസ് നേടാനായതും സ്‌കൂളിനു നേട്ടമായി. പാഞ്ഞാള്‍ ഗവണ്‍മെന്റ് ഹയര്‍ സെക്കന്ററി സ്‌കൂളില്‍ 93.5 ശതമാനമാണു വിജയം. 170 കുട്ടികള്‍ പരീക്ഷയെഴുതിയപ്പോള്‍ 159 പേര്‍ വിജയിച്ചു.
മൂന്നു പേര്‍ക്കു മുഴുവന്‍ വിഷയങ്ങളിലും എ പ്ലസ് ലഭിച്ചു. മുണ്ടത്തിക്കോട് എന്‍.എസ്.എസ് ഹയര്‍ സെക്കന്ററി സ്‌കൂളില്‍ വിജയശതമാനം 85 ആണ്. 213 പേര്‍ പരീക്ഷയെഴുതിയപ്പോള്‍ വിജയിച്ചതു 182 പേര്‍ മാത്രമാണ്. മച്ചാട് ഗവണ്‍മെന്റ് ഹയര്‍ സെക്കന്ററി സ്‌കൂളില്‍ 85 ആണു വിജയശതമാനം. ചെറുതുരുത്തി ഹയര്‍ സെക്കന്ററി സ്‌കൂളില്‍ 86 ശതമാനം വിദ്യാര്‍ഥികള്‍ വിജയിച്ചു. 294 പേര്‍ പരീക്ഷയെഴുതി 253 പേര്‍ വിജയം നേടി. മുള്ളൂര്‍ക്കര എന്‍.എസ്.എസ് ഹയര്‍ സെക്കന്ററി സ്‌കൂള്‍ വിജയശതമാനത്തില്‍ ഏറെ പുറകോട്ടു പോയി.
210 പേര്‍ പരീക്ഷയെഴുതിയപ്പോള്‍ 145 പേര്‍ മാത്രമാണു വിജയിച്ചത്. 69 ശതമാനം മാത്രമാണു വിജയം. വടക്കാഞ്ചേരി ഗവണ്‍മെന്റ് വൊക്കേഷ്ണല്‍ ഹയര്‍ സെക്കന്‍ഡറി സ്‌കൂളില്‍ 96 ശതമാനം വിജയം നേടാനായി. 90 പേര്‍ പരീക്ഷക്കിരുന്നപ്പോള്‍ 86 പേരും വിജയിച്ചു.