നീലേശ്വരം: നഗരസഭയിലെ വിവിധ പ്രദേശങ്ങളിലെ അനധികൃത ഭൂമി കൈയേറ്റങ്ങള്‍ ഒഴിപ്പിച്ചു തുടങ്ങി. സ്വകാര്യ വ്യക്തികളും സ്ഥാപനങ്ങളും കൈയേറിയ ഭൂമിയാണ് ഒഴിപ്പിച്ചു തുടങ്ങിയത്. ഇന്നലെ നടന്ന ഒഴിപ്പിക്കലില്‍ രണ്ട് ഏക്കര്‍ സ്ഥലം നഗരസഭ തിരിച്ചുപിടിച്ചു. കച്ചേരിക്കടവിലെ കൈയേറ്റഭൂമിയാണ് തിരിച്ചുപിടിച്ചത്. വലിയപട്ടം ടൈല്‍സ് കൈയേറിയ 30 സെന്റ് ഭൂമിയും കുഞ്ഞമ്പു നായര്‍, കണിച്ചിറ നാരായണന്‍ എന്നിവര്‍ കൈയേറിയ പുഴ പുറമ്പോക്കുമാണ് തിരിച്ചുപിടിച്ചത്. ഇവിടെ നഗരസഭയുടെ സ്ഥലം എന്നെഴുതിയ ബോര്‍ഡുകളും സ്ഥാപിച്ചിട്ടുണ്ട്.
ഒഴിപ്പിക്കലിന് ചെയര്‍മാന്‍ കെ.പി ജയരാജന്‍, ഉപാധ്യക്ഷ വി. ഗൗരി, സ്ഥിരം സമിതി അധ്യക്ഷന്മാര്‍, കൗണ്‍സിലര്‍മാര്‍, ജനറല്‍ സര്‍വേയര്‍ കെ. രവീന്ദ്രന്‍, ജില്ലാ സര്‍വേയര്‍ പി. ബാബു, രമേശന്‍, വില്ലേജ് ഫീല്‍ഡ് അസിസ്റ്റന്റ് കെ. രാജീവന്‍ എന്നിവര്‍ നേതൃത്വം നല്‍കി.
നഗരസഭയിലെ അനധികൃത കൈയേറ്റങ്ങള്‍ കണ്ടെത്തുന്നതിനായി സമിതി രൂപീകരിച്ചിരുന്നു. അഴിത്തല, കടിഞ്ഞിമൂല, കച്ചേരിക്കടവ് എന്നിവിടങ്ങളില്‍ പുഴയോരവും തെരു റോഡ്, മാര്‍ക്കറ്റ് ജങ്ഷന്‍ പരിസരം എന്നിവിടങ്ങളില്‍ പൊതുസ്ഥലവും, കോട്ടപ്പുറത്ത് പുറമ്പോക്കും കൈയേറിയതായി ഇവര്‍ കണ്ടെത്തുകയും ചെയ്തിരുന്നു.
ആദ്യം ഉപാധ്യക്ഷ വി. ഗൗരി, കൗണ്‍സിലര്‍മാരായ എറുവാട്ട് മോഹനന്‍, പി. ഭാര്‍ഗവി, പി.കെ രതീഷ് തുടങ്ങിയവരടങ്ങിയ സമിതിയായിരുന്നു രൂപീകരിച്ചിരുന്നത്. തുടര്‍ന്ന് ചെയര്‍മാനേയും, സ്ഥിരം സമിതി അധ്യക്ഷരെയും ഉള്‍പ്പെടുത്തി സമിതി വിപുലീകരിച്ചു. ഇവരുടെ അന്വേഷണത്തില്‍ കണ്ടെത്തിയ കൈയറ്റ ഭൂമിയുടെ രേഖകള്‍ ഹാജരാക്കാനായി സമയവും നല്‍കിയിരുന്നു. എന്നാല്‍ ആര്‍ക്കും രേഖകള്‍ ഹാജരാക്കാന്‍ കഴിഞ്ഞില്ല. ഇതേ തുടര്‍ന്ന് നഗരസഭയുടെ അഭ്യര്‍ഥന പ്രകാരം കലക്ടറുടെ നിര്‍ദേശമനുസരിച്ച് കൈയേറ്റ ഭൂമി കണ്ടെത്താനായി ഉദ്യോഗസ്ഥ സംഘം തിങ്കളാഴ്ച മുതല്‍ സര്‍വേ ആരംഭിച്ചിരുന്നു. ഇതിന്റെ തുടര്‍നടപടി എന്ന നിലയിലാണ് ഒഴിപ്പിക്കല്‍ തുടങ്ങിയത്.