ബദിയഡുക്ക: മണല്‍ കടത്തുന്നതിനിടെ തടഞ്ഞു നിര്‍ത്തി ഡ്രൈവറെ തള്ളിയിട്ട് ടിപ്പര്‍ ലോറി തട്ടിക്കൊണ്ടുപോയ സംഭവത്തില്‍ നാലു പേര്‍ക്കെതിരേ ബദിയഡുക്ക പൊലിസ് കേസെടുത്തു.
പെര്‍ള അമെക്കളയിലെ ജൗഹര്‍, ഖലീല്‍, കണ്ണാടിക്കാനയിലെ അനീസ്, ഉക്കിനടുക്കയിലെ ഖലീല്‍ എന്നിവര്‍ക്കെതിരേയാണ് കേസ്. ഡ്രൈവര്‍ പെര്‍ള അമെക്കളയിലെ പ്രശാന്ത് കുമാറിന്റെ പരാതിയിലാണ് ഇവര്‍ക്കെതിരേ കേസെടുത്തത്.
കഴിഞ്ഞദിവസം രാത്രി എട്ടോടെ കര്‍ണാടകയില്‍നിന്ന് മണലുമായി എത്തിയ ലോറി പെര്‍ള ഇടിയടുക്കയില്‍ നാലംഗ സംഘം തടയുകയും ലോറി തട്ടിയെടുത്ത് മണിയംപാറ റോഡിലേക്ക് കടന്ന് കളയുകയായിരുന്നു. തുടര്‍ന്ന് അതുവഴി വന്ന പൊലിസുകാരോട് ഡ്രൈവര്‍ വിവരം അറിയിച്ചതിനെ തുടര്‍ന്ന് പിന്തുടരുകയും ചെയ്തു. തുടര്‍ന്ന് ബെദിരംപള്ളയിലെ സ്വകാര്യ വ്യക്തിയുടെ പറമ്പില്‍ മണല്‍ ഇറക്കി ലോറിയുമായി പോകാന്‍ ശ്രമിക്കുന്നതിനിടെ പൊലിസിനെ കണ്ട പ്രതികള്‍ ലോറി ഉപേക്ഷിച്ച് രക്ഷപ്പെടുകയായിരുന്നു. ലോറി പൊലിസ് കസ്റ്റഡിയിലെടുത്തു.