കാസര്‍കോട്: കുഡ്‌ലു സര്‍വിസ് സഹകരണ ബാങ്കില്‍നിന്ന് സ്വര്‍ണവും പണവും കവര്‍ന്ന കേസില്‍ മാപ്പുസാക്ഷിയാക്കണമെന്ന ഒരു പ്രതിയുടെ അപേക്ഷയെ പബ്ലിക് പ്രോസിക്യൂട്ടര്‍ എതിര്‍ത്തു. കേസില്‍ മാപ്പുസാക്ഷിയാക്കണമെന്നാവശ്യപ്പെട്ട് ആറാംപ്രതി ജോമോന്‍ എന്ന ഫെനിക്‌സ് നെറ്റോ നല്‍കിയ അപേക്ഷയെ എതിര്‍ത്താണ് പബ്ലിക് പ്രോസിക്യൂട്ടര്‍ ജില്ലാ അഡീഷണല്‍ സെഷന്‍സ് (ഒന്ന്) കോടതിയില്‍ റിപ്പോര്‍ട്ട് നല്‍കിയത്.
ജോമോന്റെ അപേക്ഷ ഇന്നലെ പരിഗണിക്കാനിരിക്കെയാണ് മാപ്പുസാക്ഷിയാക്കുന്നതിനെതിരേ പബ്ലിക് പ്രോസിക്യൂട്ടര്‍ പി. രാഘവന്‍ കോടതിയില്‍ റിപ്പോര്‍ട്ട് സമര്‍പ്പിച്ചത്. പ്രോസിക്യൂട്ടര്‍ എതിര്‍ത്ത സാഹചര്യത്തില്‍ അപേക്ഷ പിന്‍വലിക്കുന്നതായി അറിയിച്ചുകൊണ്ടുള്ള വിടുതല്‍ ഹരജി ജോമോന്‍ കോടതിയില്‍ ഹാജരാക്കി. ജോമോനെ കേസില്‍ മാപ്പുസാക്ഷിയാക്കേണ്ട ആവശ്യം ഇല്ലെന്നാണ് പ്രോസിക്യൂഷന്‍ നിലപാട്.
2015 സെപ്റ്റംബര്‍ ഏഴിനാണ് കുഡ്‌ലു ബാങ്കില്‍ നിന്ന് അഞ്ചേകാല്‍ കോടിയോളം വരുന്ന സ്വര്‍ണവും 13 ലക്ഷം രൂപയും കവര്‍ച്ച ചെയ്തത്. ഇതില്‍17.684 കിലോഗ്രാം സ്വര്‍ണം കണ്ടെത്തിയിരുന്നു.