മുംബൈ: ഈ വര്‍ഷം ഫ്രാന്‍സില്‍ നടക്കുന്ന അണ്ടര്‍ 20 വനിതാ ഫുട്‌ബോള്‍ ലോകകപ്പ് നിയന്ത്രിക്കാന്‍ ഇന്ത്യന്‍ റഫറിയും. ഗോവ കനകോണ സ്വദേശിയും മുന്‍ ഇന്ത്യന്‍ ഫുട്‌ബോളറുമായിരുന്ന യുവേന ഫെര്‍ണാണ്ടസാണ് ലോകകപ്പ് നിയന്ത്രിക്കാന്‍ തിരഞ്ഞെടുക്കപ്പെട്ടത്. അസിസ്റ്റന്റ് റഫറിമാരുടെ പട്ടികയിലാണ് യുവേന ഇടംപിടിച്ചത്. ചരിത്രത്തില്‍ ആദ്യമായാണ് അണ്ടര്‍ 20 വനിതാ ലോകകപ്പ് നിയന്ത്രിക്കാന്‍ ഇന്ത്യന്‍ റഫറിയെ നിയോഗിക്കുന്നത്. ആഗസ്റ്റ് അഞ്ചു മുതല്‍ 24 വരെയാണ് ലോകകപ്പ് നടക്കുന്നത്. കഴിഞ്ഞ അണ്ടര്‍ 17 വനിതാ ലോകകപ്പിലെ മത്സരങ്ങളും യുവേന നിയന്ത്രിച്ചിരുന്നു. ഫൈനല്‍ മത്സരം അടക്കം നാലു മത്സരങ്ങളാണ് അന്ന് യുവേന നിയന്ത്രിച്ചത്.