മോസ്‌കോ: കഴിഞ്ഞ ദിവസം റഷ്യ ലോകകപ്പിലേക്ക് പ്രഖ്യാപിച്ച ടീമില്‍ മരുന്നടി വിവാദത്തില്‍ നടപടി നേരിടുന്ന താരവും. ഫിഫയുടെ അന്വേഷണം നേരിടുന്ന താരത്തെ ലോകകപ്പ് ടീമിലുള്‍പ്പെടുത്തിയതിനെച്ചൊല്ലിയാണിപ്പോള്‍ റഷ്യയിലെ പുതിയ വിവാദം.
റഷ്യന്‍ പ്രതിരോധ താരം റുസ്‌ലാല്‍ കംബളോവിനെയാണ് അടുത്ത മാസം നടക്കുന്ന ലോകകപ്പ് ടീമിലേക്ക് തിരഞ്ഞെടുത്തിട്ടുള്ളത്. എന്നാല്‍ കഴിഞ്ഞ മാസം ഇതു സംബന്ധിച്ച കേസ് തെളിവില്ലാത്തതിന്റെ പേരില്‍ ഒഴിവാക്കിയിട്ടുണ്ടെന്ന് കംബളോവന്റെ വക്കീല്‍ പറഞ്ഞു. ലോകകപ്പിന് മുന്നോടിയായി റഷ്യ കളിച്ച അഞ്ചു മത്സരങ്ങളിലും തോറ്റിരിക്കുകയാണ്.
ഇതില്‍ നിന്ന് കരകയറി ടീമിനെ രക്ഷിക്കുന്നതിനാണ് താരത്തെ ടീമിലുള്‍പ്പെടുത്തിയതെന്ന ആരോപണം നിലനില്‍ക്കുന്നുണ്ട്. 28 അംഗ ടീമിലെ മൂന്ന് പേര്‍ മാത്രമാണ് റഷ്യക്ക് പുറത്തുള്ള ക്ലബുകളില്‍ കളിക്കുന്ന താരങ്ങളുള്ളത്. വിയ്യാറയല്‍ വിങ്ങ് ബാക്ക് ഡെനിസ് ചെറിഷേവ്, തുര്‍ക്കി ക്ലബായ ഫെനര്‍ബെഹ്‌സ് താരം റോമന്‍ നോസ്റ്റീഡര്‍, ബല്‍ജിയം ക്ലബായ ബ്രഗ്ഗേയുടെ ഗോള്‍കീപ്പറായ വ്‌ളാദിമര്‍ ഗാബുലേവ് എന്നിവര്‍ മാത്രമാണ് റഷ്യക്ക് പുറത്തു നിന്ന് ലോകകപ്പിന് പന്തു തട്ടാനെത്തുന്നത്. ലോകകപ്പിന്റെ ഉദ്ഘാടന മത്സരത്തില്‍ സഊദി അറേബ്യയും റഷ്യയും തമ്മിലാണ് ഏറ്റുമുട്ടുന്നത്.