ആറ്റിങ്ങല്‍: ആളൊഴിഞ്ഞ മേഖലയിലും അവനവഞ്ചേരി സ്‌കൂള്‍ പരിസരത്തും രാത്രികാലങ്ങളില്‍ കക്കൂസ്മാലിന്യം നിക്ഷേപിക്കുന്ന സംഘത്തിലെ നാലുപേരെ പൊലിസ് പിടികൂടി. ആലപ്പുഴ സ്വദേശി ഷാജി, എറണാകുളം സ്വദേശികളായ റിയാസ്, നിഹാസ്, അബ്ദുല്‍ റഹ്മാന്‍ എന്നിവരെയാണ് ആറ്റിങ്ങല്‍ പൊലിസ് പിടികൂടിയത്.
കഴിഞ്ഞ ഏതാനും ദിവസങ്ങളായി ഈ പ്രദേശത്തു ഇത്തരത്തില്‍ മാലിന്യം തള്ളുന്നത് പതിവായിരുന്നു. നാട്ടുകാര്‍ പൊലിസില്‍ പരാതിനല്‍കിയിട്ടും സമഗ്രമായ അന്വേഷണം നടന്നില്ല. ഒടുവില്‍ പ്രദേശവാസികള്‍ തന്നെ മാലിന്യവുമായി എത്തിയ ടാങ്കര്‍ തൊഴിലാളികള്‍ അടക്കം പിടികൂടി പൊലിസിന് കൈമാറുകയായിരുന്നു. എന്നാല്‍ ഇവര്‍ക്കെതിരെ യാതൊരു നടപടിയും പൊലിസ് കൈക്കൊണ്ടില്ല. ഇതില്‍ പ്രതിഷേധിച്ചു നാട്ടുകാര്‍ റോഡ് ഉപരോധവും നഗരസഭയില്‍ പ്രതിപക്ഷ ബഹളവുമൊക്കെ നടത്തിയിരുന്നു.
പ്രതിഷേധം ശക്തിപ്പെട്ടപ്പോള്‍ മാത്രമാണ് നാട്ടുകാര്‍ പിടികൂടിയവരുടെ അറസ്റ്റ് രേഖപ്പെടുത്തിയത്.