തിരുവനന്തപുരം: ജില്ലയിലെ റേഷന്‍ വിതരണത്തിനുള്ള മുന്‍ഗണനാ വിഭാഗത്തില്‍ അനര്‍ഹമായി കടന്നുകൂടിയ 23,255 പേരെ ഒഴിവാക്കിയതായി ജില്ലാ സപ്ലൈ ഓഫിസര്‍ കെ. സുരേഷ് കുമാര്‍ അറിയിച്ചു.
ഇവരെ കണ്ടെത്തി മുന്‍ഗണനാ വിഭാഗത്തില്‍ നിന്ന് ഒഴിവാക്കുകയും പകരം അര്‍ഹരായ പട്ടികയില്‍പ്പെടാത്തവരെ ഈ വിഭാഗത്തില്‍ ഉള്‍പ്പെടുത്തി. അര്‍ഹരായിട്ടും പട്ടികയില്‍ ഉള്‍പ്പെടാതിരുന്ന 1687 പേരെ അന്ത്യോദയാ അന്ന യോജന ലിസ്റ്റില്‍ പുതുതായി ചേര്‍ത്തു.
തിരുവനന്തപുരം താലൂക്ക് സപ്ലൈ ഓഫിസ് പരിധിയില്‍ മാത്രം 425 പേരെ ഇപ്രകാരം ഉള്‍പ്പെടുത്തി. മുന്‍ഗണനാ കാര്‍ഡിനത്തില്‍ ജില്ലയിലാകെ 17,902 പേരെ പുതുതായി ഉള്‍പ്പെടുത്തി. ജില്ലയിലാകെ 1888 റേഷന്‍ കടകളിലായി 8,80,205 കാര്‍ഡ് ഉടമകളാണുള്ളത്. 63,385 അന്ത്യോദയാ അന്ന യോജനാ കാര്‍ഡുകളും(മഞ്ഞ), 3,41,332 മുന്‍ഗണനാ കാര്‍ഡുകളും (ചുമപ്പ്), 2,50,801 സബ്‌സിഡി കാര്‍ഡുകളും (നീല), 2,24,687 മുന്‍ഗണനേതര കാര്‍ഡുകളും നിലവിലുണ്ട്. റേഷന്‍ സാധനങ്ങള്‍ കടകളിലെത്തിയാല്‍ ഉപഭോക്താവിന് മൊബൈല്‍ വഴി സന്ദേശം നല്‍കുന്ന പുതിയ സംവിധാനം പൊതുജനങ്ങള്‍ക്ക് ഏറെ ഉപയോഗപ്രദമാണ്.
വാതില്‍പ്പടി റേഷന്‍ വിതരണം കാര്യക്ഷമമായി ജില്ലയില്‍ നടന്നുവരുന്നു. മൊത്തവിതരണക്കാരെ ഒഴിവാക്കി സിവില്‍ സപ്ലൈസ് വകുപ്പിനാണ് ഇപ്പോള്‍ വിതരണ ചുമതലയെന്നും ജില്ലാ സപ്ലൈ ഓഫിസര്‍ അറിയിച്ചു.