കാലിഫോര്‍ണിയ: ഇന്ത്യന്‍ വെല്‍സ് ഓപണ്‍ ടെന്നീസ് ടൂര്‍ണമെന്റില്‍ റോജര്‍ ഫെഡറര്‍ മൂന്നാം റൗണ്ടില്‍ സ്റ്റീവ് ജോണ്‍സനെ വീഴ്ത്തി നാലാം റൗണ്ടില്‍ കടന്നു. നാലാം റൗണ്ടില്‍ റാഫേല്‍ നദാലുമായിട്ടാണ് ഫെഡററുടെ പോരാട്ടം. ആസ്‌ത്രേലിയന്‍ ഓപണ്‍ ഫൈനലിന് ശേഷം ഇരുവരും നേര്‍ക്കുനേര്‍ വരുന്ന പോരാട്ടം കൂടിയാണിത്. ഫെഡറര്‍ ജോണ്‍സനെ കടുത്ത പോരാട്ടത്തിലാണ് വീഴ്ത്തിയത്. സ്‌കോര്‍ 7-6, 7-6, നദാല്‍ ഫെര്‍നാണ്ടോ വെര്‍ഡാസ്‌കോയെയാണ് പരാജയപ്പെടുത്തിയത്. സ്‌കോര്‍ 6-3, 7-5. ടൂര്‍ണമെന്റില്‍ താരത്തിന്റെ 50ാമത് വിജയമാണിത്.
അതേസമയം സൂപ്പര്‍ താരം നൊവാക് ദ്യോക്കോവിച് നാലാം റൗണ്ടില്‍ കടന്നു. യുവാന്‍ മാര്‍ട്ടിന്‍ ഡെല്‍ പോട്രോയെയാണ് പരാജയപ്പെടുത്തിയത്. സ്‌കോര്‍ 7-5, 4-6, 6-1. രണ്ടാം റൗണ്ടില്‍ നിക് കിര്‍ഗിയോസാണ് താരത്തിന്റെ എതിരാളി. വനിതാ വിഭാഗം ഡബിള്‍സില്‍ സാനിയ മിര്‍സ- ബാര്‍ബറ സ്‌ട്രൈക്കോവ സഖ്യത്തിന് തോല്‍വി നേരിട്ടു. ക്വാര്‍ട്ടറില്‍ സ്വിസ് സഖ്യം മാര്‍ട്ടിന ഹിംഗിസ്-യുങ് ജാന്‍ ചാന്‍ സഖ്യത്തോടാണ് പരാജയപ്പെട്ടത്. സ്‌കോര്‍ 4-6, 4-6.