ജിദ്ദ: വിദേശ തൊഴിലാളികളുടെ ഇഖാമ പുതുക്കാത്ത തൊഴിലുടമകള്‍ക്ക് കൂടുതല്‍ കടുത്ത ശിക്ഷ ബാധകമാക്കുമെന്ന് ആഭ്യന്തര മന്ത്രാലയം അറിയിച്ചു. ഇതിന്റെ ഭാഗമായി വിദേശികളുടെ തിരിച്ചറിയില്‍ രേഖയായ ഇഖാമ പുതുക്കാത്ത സ്‌പോണ്‍സര്‍മാര്‍ക്ക് സര്‍ക്കാര്‍ വകുപ്പുകളില്‍ നിന്നുള്ള സേവനങ്ങള്‍ നിര്‍ത്തിവയ്ക്കാനും മന്ത്രാലയം നീക്കം ആരംഭിച്ചു. ഇഖാമ പുതുക്കാത്തതിനുള്ള പിഴയും മറ്റു ശിക്ഷാ നടപടികളും തൊഴിലുടമകള്‍ക്കെതിരെ സ്വീകരിക്കും. നിലവില്‍ കൃത്യസമയത്ത് ഇഖാമ പുതുക്കാത്തവര്‍ക്ക് ജവാസാത്ത് ഡയറക്ടറേറ്റ് പിഴ ചുമത്തുന്നുണ്ട്. ആദ്യ തവണ ഇതു 500 റിയാലാണ്. നിയമ ലംഘനം ആവര്‍ത്തിക്കുന്നവര്‍ക്ക് പിഴ ഇരട്ടിയുമാണ്.

ഇതിനു പുറമെയാണ് ഇഖാമ പുതുക്കാത്ത തൊഴിലുടമകള്‍ക്കെതിരെ തൊഴില്‍ സാമൂഹിക വികസന മന്ത്രാലയവും ശിക്ഷാ നടപടിയും സര്‍ക്കാര്‍ സേവനങ്ങള്‍ നിര്‍ത്തിവെക്കാനും തീരുമാനിച്ചത്. അതേ സമയം സഊദിയിലെത്തി നിശ്ചിത സമയത്തിനകം തൊഴിലുടമകള്‍ ഇഖാമ എടുക്കാത്ത സന്ദര്‍ഭങ്ങളിലും കാലാവധി അവസാനിച്ച ഇഖാമ പുതുക്കി നല്‍കാത്ത സാഹചര്യങ്ങളിലും തൊഴിലുടമയുടെ അനുമതി കൂടാതെ മറ്റു സ്‌പോണ്‍സര്‍ഷിപ്പ് മാറ്റുന്നതിന് തൊഴിലാളികള്‍ക്ക് അവകാശമുണ്ടെന്നും ജവാസാത്ത് വിഭാഗം അറിയിച്ചു. തുടര്‍ച്ചയായി മൂന്നു മാസത്തെ ശമ്പളം ലഭിക്കാത്ത തൊഴിലാളികളെയും സ്‌പോണ്‍സര്‍ഷിപ്പ് മാറാന്‍ അനുമതി നല്‍കും.

തുടര്‍ച്ചയായി രണ്ടു മാസത്തെ വേതനം വിതരണം ചെയ്യാത്ത തൊഴിലുടമകള്‍ക്ക് തൊഴില്‍ സാമൂഹിക വികസന മന്ത്രാലയത്തില്‍ നിന്നുള്ള സേവനങ്ങള്‍ നിര്‍വെക്കുമെന്നും മന്ത്രാലയ വൃത്തങ്ങള്‍ അറിയിച്ചു.
പിഴകളും മറ്റു ശിക്ഷാ നടപടികളും ഒഴിവാക്കുന്നതിന് കാലാവധി അവസാനിക്കുന്നതിന് മുമ്പായി വിദേശ തൊഴിലാളികളുടെയും ആശ്രിതരുടെയും ഇഖാമ പുതുക്കണമെന്നും ജവാസാത്ത് ഡയറക്ടറേറ്റും ആവശ്യപ്പെട്ടു. ഇതിനായി ജവാസാത്ത് നാഷണല്‍ ഇന്‍ഫര്‍മേഷന്‍ സെന്റുമായി സഹകരിച്ച് പുതുത്തായി പുറത്തിറക്കിയ സ്മാര്‍ട്ട് ഫോണ്‍ ആപ്ലിക്കേഷന്‍ വഴിയും ഇഖാമയുടെ കാലാവധി അറിയാനും പുതുക്കാനും സാധിക്കും.