ഉഴവൂര്‍: ജലവിതരണത്തിനായി നിലവിലുണ്ടായിരുന്ന റോഡ് വെട്ടിപ്പൊളിച്ച് പൈപ്പുകള്‍ സ്ഥാപിച്ചശേഷം റോഡ് ഗതാഗതയോഗ്യമാക്കിയില്ലെന്നു പരാതി. രണ്ടു വര്‍ഷം മുന്‍പാണ് ഉഴവൂര്‍ പഞ്ചായത്ത് ഒന്‍പതാം വാര്‍ഡ് ചിറ്റേട്ട് തുലാമറ്റം റോഡ് വെട്ടിപൊളിച്ചിട്ടത്. റോഡ് വെട്ടിപ്പൊളിച്ചതിനു ശേഷം റോഡ് ഗതാഗതയോഗ്യമാക്കാന്‍ വെള്ളൂര്‍ വെളിയന്നൂര്‍ ജല വിതരണ പദ്ധതിയുടെ ജോലികളേറ്റെടുക്കുന്ന കോണ്‍ട്രാക്ടര്‍മാരോ, പഞ്ചായത്തോ തയ്യാറാകുന്നില്ലെന്നാണു നാട്ടുകാര്‍ പറയുന്നത്.
 അന്നത്തെ പഞ്ചായത്തംഗത്തിനും, ഭരണ സമിതിക്കും നാട്ടുകാര്‍ നിരവധി തവണ പരാതി നല്‍കിയിട്ടും ആരും തിരിഞ്ഞുപോലും നോക്കിയില്ലെന്നു നാട്ടുകാര്‍ പറയുന്നു. പുതിയ ഭരണസമിതി രംഗത്തെത്തിയപോഴും വാര്‍ഡംഗത്തിനും, ഭരണ സമിതിക്കും, പ്രസിഡന്റിനുമെല്ലാം പരാതികള്‍ നല്‍കിയെങ്കിലും ഇതിനൊരു പരിഹാരം കാണാനായിട്ടില്ല. മഴയെത്തിയാല്‍ കാല്‍നാടയാത്രപോലും ദുഷ്‌ക്കരമായ അവസ്ഥയിലാണ് റോഡ്.
31 കുടുംബങ്ങള്‍ ആശ്രയിച്ചിരുന്ന റോഡാണു രണ്ടുവര്‍ഷമായിട്ടും ഗതാഗതയോഗ്യമാക്കാത്തത്. സ്‌കൂള്‍ തുറന്നതോടെ കുട്ടികളുടെ യാത്രയാണ് ഏറെ ദുഷ്‌ക്കരമായിരിക്കുന്നത്.   റോഡ് ഗതാഗതയോഗ്യമാക്കുന്നതിനുള്ള നടപടികള്‍ ഉടന്‍ ആരംഭിച്ചില്ലെങ്കില്‍ ശക്തമായ സമരപരിപാടികള്‍ പഞ്ചായത്തു പടിക്കല്‍ നടത്തുന്നതിനാണ് റോഡ് ഉപഭോക്താക്കള്‍ തീരുമാനിച്ചിരിക്കുന്നത്.