തളിപ്പറമ്പ്: ഓരോരോ വ്യക്തികള്‍ ചേര്‍ന്ന് ചെറിയ മാറ്റങ്ങള്‍ നടത്താന്‍ തയാറായാല്‍ സമൂഹത്തില്‍ വലിയ വിപ്ലവം കൊണ്ടുവരാന്‍ കഴിയുമെന്ന് കലക്ടര്‍ മിര്‍ മുഹമ്മദലി. നിര്‍ധനരുടെ വിശപ്പകറ്റാന്‍ എല്ലാവരും രംഗത്തെത്തിയാല്‍ ഫുഡ് ഫ്രീ റഫ്രിജറേറ്ററുകളുടെ ആവശ്യമില്ലെന്നും കലക്ടര്‍ വ്യക്തമാക്കി. തളിപ്പറമ്പില്‍ അത്താഴക്കൂട്ടം ആരംഭിച്ച സൗജന്യ ഭക്ഷണ ഫ്രീസര്‍ ഉദ്ഘാടനം ചെയ്യുകയായിരുന്നു അദ്ദേഹം. മറ്റുള്ളവന്റെ വിശപ്പകറ്റാന്‍ ഓരോരുത്തരും മുന്നിട്ടിറങ്ങണമെന്നും കലക്ടര്‍ വ്യക്തമാക്കി. വിശപ്പ് രഹിത-ഭിക്ഷാടന വിമുക്ത നഗരമാക്കി തളിപ്പറമ്പിനെ മാറ്റുക എന്ന ലക്ഷ്യത്തോടെയാണ് അത്താഴക്കൂട്ടം ദേശീയപാതയോരത്ത് ട്രാഫിക് ഐലന്റിന് സമീപത്തായി സൗജന്യ ഭക്ഷണ ഫ്രീസര്‍ ഒരുക്കിയിട്ടുള്ളത്. നഗരസഭ ചെയര്‍മാന്‍ മഹമൂദ് അള്ളാംകുളം അധ്യക്ഷനായി. പ്രതിപക്ഷ നേതാവ് കെ മുരളീധരന്‍, ഇ.പി കുബേരന്‍ നമ്പൂതിരിപ്പാട്, ഫാ. ജോസഫ് മഞ്ചപ്പിള്ളില്‍, അബൂബക്കര്‍ സിദ്ദിഖ് അസ്ഹരി സംസാരിച്ചു.