പേരാമ്പ്ര: പഞ്ചായത്ത് അധികൃതരുടെ അവഗണനയും അനാസ്ഥയും രോഗബാധിതനായ വികലാംഗന്റെ എട്ടു മാസത്തെ പെന്‍ഷന്‍ മുടക്കി.
പരേതനായ അബ്ദുല്ലയുടെ മകന്‍ മുറിച്ചാണ്ടി മീത്തല്‍ മുനീര്‍ (35) ആണ് പെന്‍ഷന്‍ കിട്ടാതെ രോഗചികിത്സ പോലും നിഷേധിക്കപ്പെടുന്നത്. എട്ടു മാസം മുന്‍പു വരെ ഇയാള്‍ക്ക് കൃത്യമായി പെന്‍ഷന്‍ വീട്ടിലെത്തിയിരുന്നു. മുനീറിന്റെ പേരില്‍ ആധാര്‍ കാര്‍ഡ് എടുക്കാത്തതാണ് പെന്‍ഷന്‍ മുടങ്ങാനിടയായത്. ആധാര്‍ കാര്‍ഡിനു വേണ്ടി അക്ഷയ സെന്ററില്‍ ഫോട്ടോയെടുക്കാന്‍ പോകാന്‍ ഇയാള്‍ക്ക് കഴിയില്ല.
രണ്ടു കാലിനും കൈക്കും വൈകല്യം ബാധിച്ച മുനീറിന്റെ വീട്ടില്‍ ഫോട്ടോ എടുക്കാന്‍ ആള്‍ വരുമെന്ന് പഞ്ചായത്ത് അധികൃതര്‍ പല തവണ ഉറപ്പു നല്‍കിയിരുന്നു. എന്നാല്‍ അധികൃതരുടെ ഉറപ്പ് പാഴ്‌വാക്കായി മാറുകയായിരുന്നു.
ആധാര്‍ കാര്‍ഡ് ആവശ്യവുമായി ബന്ധുക്കള്‍ നിരവധി തവണ പഞ്ചായത്ത് ഓഫിസില്‍ കയറിയിറങ്ങാന്‍ തുടങ്ങിയിട്ട് കാലമേറെയായി. പ്രമേഹ രോഗിയായ മുനീര്‍ ദിനംപ്രതി രണ്ടുനേരം ഇന്‍സുലിന് വിധേയനാകുന്നുണ്ട്. മുനീറിനെ പരിചരിക്കുന്ന ആള്‍ക്ക് ഇതുവരെ മാസം തോറും സാമ്പത്തിക സഹായം ലഭിച്ചിരുന്നു. അതും മുടങ്ങിയിരിക്കയാണിപ്പോള്‍.