കോഴിക്കോട്: മിഠായിത്തെരുവ് തീപിടിത്തതില്‍ അഗ്‌നിക്കിരയായ മോഡേണ്‍  ടെക്‌സ്റ്റൈല്‍സ് അപകടാവസ്ഥയില്‍. കത്തിയ കടയുടെ ഭാഗങ്ങള്‍ ഏതു നിമിഷവും പൊളിഞ്ഞു വീഴാവുന്ന അവസ്ഥയിലാണ്. തീപിടിത്തമുണ്ടായി ദിവസങ്ങള്‍ കഴിഞ്ഞിട്ടും കത്തിയ കെട്ടിടം അതേയവസ്ഥയില്‍ തന്നെയാണ്. മൂന്നുനിലയുള്ള കടയുടെ മുകള്‍ത്തട്ടിലെ അലൂമിനിയം ഫാബ്രിക്കേഷന്‍ ഭാഗങ്ങള്‍ ഉള്‍പ്പെടെ വസ്തുക്കള്‍ റോഡിലേക്ക് താഴ്ന്ന് കിടക്കുന്നത് അപകടഭീഷണി ഉയര്‍ത്തുന്നുണ്ട്.
തകര്‍ന്ന കടയുടെ തൊട്ടുതാഴെ വഴിയോര കച്ചവടക്കാരും സാധനങ്ങള്‍ വാങ്ങാനെത്തുന്നവരും സജീമാണ്. ഇനിയൊരു തീപിടിത്തം മിഠായിത്തെരുവില്‍ ഉണ്ടാകരുതെന്ന നിര്‍ബന്ധം അഗ്നിസുരക്ഷാ ഉദ്യോഗസ്ഥര്‍ ഉള്‍പ്പെടെ അധികൃതര്‍ക്കുള്ളതിനാല്‍ തെരുവിലെ സുരക്ഷാ സംവിധാനങ്ങള്‍ കുറ്റമറ്റതാക്കാന്‍ ശ്രമം നടക്കുന്നുണ്ട്.
സുരക്ഷാക്രമീകരണം പുരോഗമിക്കുന്നുണ്ടെന്നും വ്യാപാരികള്‍ പരിശോധനയുമായി സഹകരിക്കുന്നുണ്ടെന്നും അഗ്‌നിസുരക്ഷാ വിഭാഗം മുതിര്‍ന്ന ഉദ്യോഗസ്ഥന്‍ അരുണ്‍ഭാസ്‌കര്‍ പറഞ്ഞു. 25നു ശേഷം നടക്കുന്ന പരിശോധനക്കു മുന്നോടിയായി മുഴുവന്‍ കടകളിലും സുരക്ഷാക്രമീകരണം പൂര്‍ത്തിയാക്കണം.