മരട്: സ്വകാര്യ ആശുപത്രിയില്‍ ചികിത്സക്കെത്തിയ പതിനഞ്ചു വയസ്സുകാരിയെ സ്ഥാനം മാറി ശസ്ത്രക്രിയ നടത്തിയതായി പരാതി. സൗത്ത് പറവൂര്‍ സ്വദേശി പ്രദീപന്റെ മകള്‍ക്കാണ് മരടിലെ സ്വകാര്യ ആശുപത്രിയില്‍ വെള്ളിയാഴ്ച സ്ഥാനം മാറി ശസ്ത്രക്രിയ നടത്തിയതായി ഇന്നലെ മരട് പൊലിസില്‍ പരാതി നല്‍കി.
വലത് ഭാഗത്ത് ശസ്ത്രക്രിയ നടത്തേണ്ടതിന് പകരം ഇടത് ഭാഗത്താണ് ശസ്ത്രക്രിയ നടത്തിയതെന്നും ഇടത് ഭാഗത്ത് നേരത്തെ ശസ്ത്രക്രിയ നടത്തി സുഖപ്പെട്ടതായിരുന്നുവെന്നും പ്രദീപന്‍ പറഞ്ഞു.
ശസ്ത്രക്രിയ കഴിഞ്ഞ് പുറത്ത് കൊണ്ടുവന്നതിന് ശേഷം പരിശോധിച്ചപ്പോഴാണ് സ്ഥാനം മാറി ശസ്ത്രക്രിയ നടത്തിയ വിവരം അറിയുന്നത്. ശസ്ത്രക്രിയ നടത്തിയ ഡോക്ടറോട് വിവരം പറഞ്ഞിട്ടും പരിശോധനയ്ക്ക് എത്തിയില്ലെന്ന് വീട്ടുകാര്‍ ആരോപിക്കുന്നു.
സംഘര്‍ഷാവസ്ഥയെ തുടര്‍ന്ന് മരട് പൊലീസും സ്ഥലത്തെത്തി. തുടര്‍ന്ന് രാത്രി 11.30ന് ഡോക്ടറെ പോലീസ് വിളിച്ചു വരുത്തി. ഇന്നലെ രാവിലെ 11ന് വീട്ടുകാര്‍ നിര്‍ബന്ധപൂര്‍വ്വം ഡിസ്ചാര്‍ജ് വാങ്ങി കുട്ടിയെ തൃപ്പൂണിത്തുറയിലുള്ള മറ്റൊരു സ്വകാര്യ ആശുപത്രിയില്‍ ചികിത്സതേടി.
വലതു ഭാഗത്ത് ശസ്ത്രക്രിയ ചെയ്തതോടൊപ്പം ഇടതു ഭാഗത്ത് നേരത്തേ ശസ്ത്രക്രിയ നടത്തിയ ഭാഗത്തുണ്ടായ പഴുപ്പ് നീക്കം ചെയ്യുകയായിരുന്നു എന്നും, ശസ്ത്രക്രിയയ്ക്കു ശേഷം ഇത് ഡോക്ടര്‍ കുട്ടിയുടെ മാതാപിതാക്കളെ അറിയിക്കാന്‍ വിട്ടുപോയതാണെന്നും ആശുപത്രി അധികൃതര്‍ പറഞ്ഞു.