മാവൂര്‍: കക്കൂസ് മാലിന്യങ്ങള്‍ റോഡരികില്‍ തള്ളുന്നത് പതിവായതോടെ ഊര്‍ക്കടവ് പ്രദേശത്തുകാര്‍ പൊറുതിമുട്ടുന്നു. ചെറൂപ്പ-ഊര്‍ക്കടവ് റോഡില്‍ നെച്ചിക്കാട്ട് കടവിലാണ് കഴിഞ്ഞദിവസം കക്കൂസ് മാലിന്യം തള്ളിയത്. ആഴ്ചകള്‍ക്ക് മുന്‍പ് തൊട്ടടുത്ത് രണ്ടിടങ്ങളിലായി കക്കൂസ് മാലിന്യം തള്ളിയിരുന്നു.
ചെറൂപ്പയിലെ സ്വകാര്യവ്യക്തിയുടെ ഉടമസ്ഥതയിലുള്ള ഫ്‌ളാറ്റില്‍ നിന്നായിരുന്നു ഇത് പമ്പുചെയ്തത്. പരാതിയുടെ അടിസ്ഥാനത്തില്‍ മാവൂര്‍ പൊലിസ് മാലിന്യം തള്ളിയവരെയും ടാങ്കര്‍ ലോറിയും പിടികൂടിയിരുന്നു.
എന്നാല്‍ ചിലര്‍ പൊലിസില്‍ രാഷ്ട്രീയ സമ്മര്‍ദം ചെലുത്തി പിഴപോലും ഈടാക്കാതെ ഇവരെ വെറുതെ വിടുകയായിരുന്നുവെന്ന ആക്ഷേപമുണ്ട്.
കഴിഞ്ഞദിവസം പുഴയോട് ചേര്‍ന്ന സ്ഥലത്താണ് മാലിന്യം തള്ളിയിരിക്കുന്നത്. മഴ പെയ്യുന്നതോടെ ഇവ പൂര്‍ണമായും പുഴയിലേക്ക് ഒഴുകിയെത്തും. മാലിന്യത്തിനു മുകളില്‍ മണ്ണിട്ട് മൂടണമെന്നും ബ്ലീച്ചിങ് പൗഡര്‍ വിതറണമെന്നും ആരോഗ്യപ്രവര്‍ത്തകര്‍ വാര്‍ഡ് മെംബറോട് നിര്‍ദേശിച്ചിട്ടുണ്ട്.
ഇത്തരം സംഭവങ്ങള്‍ ഇവിടെ സ്ഥിരമായി നടക്കുന്നതിനാല്‍ സി.സി.ടി.വി കാമറ സ്ഥാപിക്കണമെന്നാണ് നാട്ടുകാരുടെ ആവശ്യം. മൂന്ന് ദിവസം പിന്നിട്ടിട്ടും യാതൊരു നടപടിയും അധികൃതരുടെ ഭാഗത്തുനിന്ന് ഉണ്ടായിട്ടില്ല.