ഔറംഗാബാദ്: മഹാരാഷ്ട്രയിലെ ഔറംഗാബാദില്‍ രണ്ടു വിഭാഗങ്ങള്‍ തമ്മിലുണ്ടായ സംഘര്‍ഷത്തില്‍ രണ്ടു പേര്‍ കൊല്ലപ്പെട്ടു. അന്‍പതിലേറെപ്പേര്‍ക്ക് സംഘര്‍ഷത്തില്‍ പരുക്കേറ്റു. നൂറിലേറെ വാഹനങ്ങള്‍ കലാപകാരികള്‍ അഗ്നിക്കിരയാക്കി.

പരുക്കേറ്റവരില്‍ 10 പൊലിസുകാരുമുണ്ട്. പ്രാദേശിക പ്രശ്‌നമാണ് വലിയ സംഘര്‍ഷത്തിലേക്കു നയിച്ചതെന്ന് മഹാരാഷ്ട്ര ആഭ്യന്തര മന്ത്രി ദീപക് കേസര്‍ക്കാര്‍ പറഞ്ഞു. സോഷ്യല്‍ മീഡിയയില്‍ ഇതേപ്പറ്റി കിംവദന്തിയും ചിത്രങ്ങളും പരന്നതോടെ അക്രമം വ്യാപിക്കുകയായിരുന്നുവെന്നും അദ്ദേഹം പറഞ്ഞു.

വെള്ളിയാഴ്ച രാത്രി 10.30 നാണ് സംഘര്‍ഷം തുടങ്ങിയത്. പ്രദേശത്ത് കനത്ത കല്ലേറ് നടക്കുകയും കടകള്‍ അടിച്ചുതകര്‍ക്കുകയും ചെയ്തു. നഗരത്തിലുണ്ടായിരുന്ന നിരവധി വാഹനങ്ങള്‍ക്ക് അക്രമികള്‍ തീയിട്ടു.