ചണ്ഡിഗഡ്:   മണിപ്പൂരിലും ഗോവയിലും ബി.ജെ.പി പണത്തിന്റെ ബലത്തില്‍ ജനവിധിയെ മോഷ്ടിച്ചാണ് അധികാരത്തിലെത്തിയതെന്ന് കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി . പഞ്ചാബ്  മുഖ്യമന്ത്രിയായി ക്യാപ്റ്റന്‍ അമരിന്ദര്‍ സിങിന്റെ സത്യപ്രതിജ്ഞ ചെയ്ത ചടങ്ങില്‍  പങ്കെടുത്ത ശേഷം സംസാരിക്കുകയായിരുന്നു അദ്ദേഹം.
 പഞ്ചാബിലെ രാജ്ഭവനില്‍ നടന്ന ചടങ്ങില്‍ കോണ്‍ഗ്രസിനെ വിജയിപ്പിച്ചതിന് ജനങ്ങളോട് നന്ദി അറിയിക്കുകയും അമരിന്ദര്‍ സിങിന്റെ സര്‍ക്കാര്‍ ജനങ്ങള്‍ക്ക് വേണ്ടി അക്ഷീണം പ്രവര്‍ത്തിക്കുമെന്നും അദ്ദേഹം ഉറപ്പ് നല്‍കി. ഗോവയില്‍ 13 സീറ്റുകള്‍ മാത്രമുള്ള ബി.ജെ.പി അധികാരത്തിലെത്തിയതിനെതിരേ ഏറ്റവും വലിയ ഒറ്റകക്ഷിയായ  കോണ്‍ഗ്രസ് അവിശ്വാസപ്രമേയം കൊണ്ടുവന്നിരുന്നു. തുടര്‍ന്ന് നടന്ന വോട്ടെടുപ്പില്‍ സ്വതന്ത്രരുടെയും ചെറു പാര്‍ട്ടികളുടെയും സഹായത്തോടെ ബി.ജെ.പി ഭരണം നിലനിര്‍ത്തി.  സമാനമായി മണിപ്പൂരിലും ഒറ്റകക്ഷിയായ കോണ്‍ഗ്രസിനെ മറികടന്ന് ചെറു പാര്‍ട്ടികളുടെ സഹായത്തോടെ ബി.ജെ.പി സര്‍ക്കാര്‍  അധികാരത്തിലേറി. ഇതിന്റെ പശ്ചാത്തലത്തിലാണ് ബി.ജെ.പിക്കെതിരേ രൂക്ഷ വിമര്‍ശനവുമായി രാഹുല്‍ ഗാന്ധി രംഗത്തെത്തിയത്.