ന്യൂഡല്‍ഹി: പാര്‍ട്ടിയില്‍ പിളര്‍പ്പുണ്ടായിട്ടില്ലെങ്കിലും അണ്ണാ ഡി.എം.കെയിലെ ശശികല വിഭാഗം നിലവിലുള്ള തെരഞ്ഞെടുപ്പ് ചിഹ്നം തങ്ങള്‍ക്ക് അവകാശപ്പെട്ടതാണെന്ന് വ്യക്തമാക്കി തെരഞ്ഞെടുപ്പ് കമ്മിഷനെ സമീപിച്ചു. പാര്‍ട്ടിയുടെ മുതിര്‍ന്ന നേതാവും ലോക്‌സഭാ ഡെപ്യൂട്ടി സ്പീക്കറുമായ എം. തമ്പിദുരൈയുടെ നേതൃത്വത്തിലാണ് ശശികല പക്ഷം തെരഞ്ഞെടുപ്പ് കമ്മിഷനെ സമീപിച്ചത്. കൂടാതെ ജനറല്‍ സെക്രട്ടറി പദത്തിലേക്ക് പുതിയ തെരഞ്ഞെടുപ്പ് നടത്താനുള്ള അനുമതിയും ഇവര്‍ തേടിയിട്ടുണ്ട്.
പാര്‍ട്ടി പിളര്‍ന്നിട്ടില്ലെങ്കിലും ഒരു ജനാധിപത്യ വ്യവസ്ഥിതിയില്‍ ജനങ്ങള്‍ക്കിടയില്‍ വ്യത്യസ്തമായ സംശയങ്ങള്‍ ഉയരാറുണ്ട്. ഈ സാഹചര്യത്തില്‍ പാര്‍ട്ടിയുടെ എം.പിമാരും എം.എല്‍.എമാരും ഐക്യത്തോടെയാണ് അടുത്ത് നടക്കാനിരിക്കുന്ന ആര്‍.കെ. നഗര്‍ ഉപതെരഞ്ഞെടുപ്പിനെ നേരിടുന്നതെന്ന് വ്യക്തമാക്കാനാണ് തെരഞ്ഞെടുപ്പ് കമ്മിഷനെ സമീപിച്ച് ചിഹ്നം തങ്ങള്‍ക്ക് മാത്രം അവകാശപ്പെട്ടതാണെന്ന് ബോധ്യപ്പെടുത്തിയതെന്ന്  തമ്പിദുരൈ പറഞ്ഞു.
ആര്‍.കെ നഗര്‍ മണ്ഡലത്തില്‍ ജയലളിത നേതൃത്വം നല്‍കിയ യഥാര്‍ഥ അണ്ണാ ഡി.എം.കെയാണ് മത്സരിക്കുന്നതെന്നും പാര്‍ട്ടി ചിഹ്നം തങ്ങള്‍ക്ക് അവകാശപ്പെട്ടതാണെന്നും ചൂണ്ടിക്കാട്ടി കഴിഞ്ഞ ദിവസം മുന്‍മുഖ്യമന്ത്രി ഒ. പനീര്‍ശെല്‍വം മുഖ്യതെരഞ്ഞെടുപ്പ് കമ്മിഷനെ സമീപിച്ചിരുന്നു.  പാര്‍ട്ടിയില്‍ ജനറല്‍ സെക്രട്ടറി പദം ശശികല കരസ്ഥമാക്കിയതിനെതിരേയും അദ്ദേഹം കമ്മിഷന് മുന്‍പാകെ പരാതി ഉന്നയിച്ചിരുന്നു. എന്നാല്‍ പാര്‍ട്ടിയില്‍ അധികാരതര്‍ക്കമുണ്ടെന്ന രീതിയില്‍ നിലപാട് സ്വീകരിക്കരുതെന്ന് തെരഞ്ഞെടുപ്പ് കമ്മിഷനോട്  ആവശ്യപ്പെട്ടതായി തമ്പിദുരൈ പറഞ്ഞു.