കോഴിക്കോട്: ജഡ്ജിമാര്‍ വിമര്‍ശനത്തിന് അതീതരല്ലെന്ന് ജസ്റ്റിസ് കെമാല്‍ പാഷ. ഡോ. സുകുമാര്‍ അഴീക്കോട് ജന്മദിനാഘോഷവും തത്ത്വമസിപുരസ്‌ക്കാര സമര്‍പ്പണവും നടത്തി സംസാരിക്കുകയായിരുന്നു അദ്ദേഹം. ജഡ്ജിമാരെ അരുതാത്തിടത്ത് കണ്ടാല്‍, അരുതാത്തത് ചെയ്താല്‍ അത് ചോദ്യം ചെയ്യാനുള്ള അവകാശമുണ്ടെന്നാണ് താന്‍ കരുതുന്നത്. കോടതി അലക്ഷ്യവും വിമര്‍ശനവും തമ്മില്‍ വ്യത്യാസമുണ്ട്. പൊതുസേവകരെന്ന നിലയില്‍ ജഡ്്ജിമാര്‍ വിമര്‍ശിക്കപ്പെടേണ്ടവരാണെന്നാണ് തന്റെ പക്ഷമെന്നും അദ്ദേഹം പറഞ്ഞു.
ഞാനിന്ന് ചങ്ങലക്കുള്ളിലാണ്. ഈ മാസം 24 ന് വിരമിച്ച ശേഷം എല്ലാം തുറന്നുപറയാം. മതങ്ങളുടെ കാര്യങ്ങള്‍ പറയാന്‍ കോടതിക്കാണ് ഭരണഘടന അവകാശം നല്‍കിയതെന്നും കെമാല്‍ പാഷ പറഞ്ഞു. ചിന്തിക്കാനും നിരൂപണം നടത്താനും പകര്‍ന്ന് കൊടുക്കാനും ധൈര്യമുള്ളവര്‍ ഇല്ലാതാകുന്ന കാലത്താണ് സുകുമാര്‍ അഴീക്കോടിന്റെ പ്രസക്തി വര്‍ധിക്കുന്നെന്നുംഅദ്ദേഹം പറഞ്ഞു.
ടി.ജി. വിജയകുമാര്‍ അധ്യക്ഷനായ ചടങ്ങില്‍ എം.പി. വീരേന്ദ്രകുമാര്‍ എം.പി, എം.എന്‍ കാരശേരി, ശ്രീജരവി, രതീദേവി, ജയചന്ദ്രന്‍ മൊകേരി, അനില്‍ കുരിയാത്തി, നര്‍ഗീസ് ബീഗം എന്നിവര്‍ ജസ്റ്റീസ് കെമാല്‍പാഷയില്‍ നിന്നും പുരസ്‌ക്കാരങ്ങള്‍ ഏറ്റുവാങ്ങി. അഡ്വ. ശിവന്‍ മഠത്തില്‍ സ്വാഗതവും മുരളീധരന്‍ വലിയവീട്ടില്‍ നന്ദിയും പറഞ്ഞു.