കാഞ്ഞങ്ങാട്: വിജിലന്‍സ് ഡയറക്ടര്‍ ജേക്കബ് തോമസുമായി ബന്ധപ്പെട്ട് ഓഡിറ്റിങ് വിഭാഗം കണ്ടെത്തിയ കാര്യങ്ങള്‍ സര്‍ക്കാര്‍ പരിശോധിക്കണമെന്ന് മുന്‍ മുഖ്യമന്ത്രി ഉമ്മന്‍ചാണ്ടി പറഞ്ഞു.
കാഞ്ഞങ്ങാട് പ്രസ് ഫോറത്തില്‍ മാധ്യമ പ്രവര്‍ത്തകരുടെ ചോദ്യത്തിന് മറുപടി പറയുകയായിരുന്നു അദ്ദേഹം.

ഓഡിറ്റിങ് വിഭാഗത്തിന്റെ കണ്ടെത്തലുകളുടെ ചില ഭാഗങ്ങളാണ് വാര്‍ത്തകളായി വന്നതെന്നും ഉമ്മന്‍ചാണ്ടി സൂചിപ്പിച്ചു. എന്നാല്‍ ജേക്കബ് തോമസിന്റെ കാര്യത്തില്‍ വാര്‍ത്തകള്‍ക്കപ്പുറം ഓഡിറ്റിങ് വിഭാഗത്തിന്റെ കണ്ടെത്തലുകള്‍ പരിശോധിക്കാന്‍ സര്‍ക്കാര്‍ തയാറാകണം. അതിന് പകരം നടപടികളെടുക്കാന്‍ കഴിയില്ലെന്ന് പറയുന്നത് ശരിയായ രീതിയല്ല.

സദാചാര പൊലിസ് ചമയുന്നവര്‍ക്കെതിരെ ശക്തമായ നടപടികള്‍ സ്വീകരിക്കുമെന്ന് മുഖ്യമന്ത്രി പറയുന്നുണ്ടെങ്കിലും ഇക്കാര്യത്തില്‍ നടപടികള്‍ സ്വീകരിക്കുന്നത് കാണുന്നില്ല.

എന്‍ഡോസള്‍ഫാന്‍ ദുരിതമനുഭവിക്കുന്നവര്‍ക്കുള്ള സഹായങ്ങള്‍ വര്‍ധിപ്പിക്കുന്നതിന് പകരം മുന്‍സര്‍ക്കാര്‍ അവര്‍ക്കനുവദിച്ച ആനുകൂല്യങ്ങള്‍ വെട്ടിക്കുറക്കാനുള്ള നീക്കമാണ് സര്‍ക്കാര്‍ നടത്തുന്നതെങ്കില്‍ ഇക്കാര്യത്തില്‍ യു.ഡി.എഫ് കയ്യും കെട്ടി നോക്കി നില്‍ക്കില്ലെന്നും ഇതിനെതിരേ ശക്തമായ പ്രക്ഷോഭങ്ങള്‍ സംഘടിപ്പിക്കുമെന്നും അദ്ദേഹം പറഞ്ഞു.