കുളത്തൂപ്പുഴ: പതിനാലുകാരിയെ പീഡിപ്പിച്ച മുത്തഛനെ കുളത്തൂപ്പുഴ പൊലിസ് അറസ്റ്റുചെയ്തു. കുളത്തൂപ്പുഴ കാഞ്ഞിരോട്ട് കുന്നുംപുറത്തെ സ്വാമി എന്നു വിളിക്കുന്ന ശശിധരന്‍(65)നെയാണ് പൊലിസ്  അറസ്റ്റു ചെയ്തത്. അമ്മയും അഛനും ഇല്ലാത്ത കുട്ടി അമ്മൂമ്മയുടെ സംരക്ഷണയിലാണ് കഴിഞ്ഞിരുന്നത്. അമ്മൂമ്മയുടെ  രണ്ടാം ഭര്‍ത്താവാണ് ശശിധരന്‍. കഴിഞ്ഞദിവസം കുട്ടി പരീക്ഷ എഴുതാന്‍ എത്താതിരുന്നതിനെ തുടര്‍ന്ന് അധ്യാപകര്‍ നടത്തിയ അന്വേഷണത്തിലാണ്  വിവരം ലഭിച്ചത്.
സ്‌കൂള്‍ അധികൃതര്‍ ചൈല്‍ഡ് ലൈനുമായി ബന്ധപ്പെടുകയായിരുന്നു. കുളത്തൂപ്പുഴ പൊലിസ് കിണറുവെട്ടുന്ന ജോലി സ്ഥലത്തു നിന്നാണ് പ്രതിയെ അറസ്റ്റു ചെയ്തത്. ബി.ജെ.പി പ്രവര്‍ത്തകനായ പ്രതി  കാവിവസ്ത്രവും താടിയുമായി കഴിഞ്ഞിരുന്നതിനാല്‍ സ്വാമി എന്ന പേരിലാണ് അറിയപ്പെട്ടിരുന്നത്. പുനലൂര്‍ താലൂക്ക് ആശുപത്രിയിലും തുടര്‍ന്ന് കൊട്ടാരക്കര ആശുപത്രിയിലും കുട്ടിയെ ദേഹപരിശോധന നടത്തുകയുണ്ടായി. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.