മംഗളൂരു: വിട്‌ള പൊലിസ് കഴിഞ്ഞദിവസം അറസ്റ്റു ചെയ്ത വാഹന മോഷണ സംഘം കാസര്‍കോട് ജില്ലയിലും കവര്‍ച്ച നടത്തിയതായി തെളിയുന്നു. മഞ്ചേശ്വരത്തും കാസര്‍കോട്ടും ഇവര്‍ കവര്‍ച്ച നടത്തിയതായി വിട്‌ള പൊലിസിന്റെ അന്വേഷണത്തില്‍ വ്യക്തമായി. അടുത്ത ദിവസം തന്നെ കാസര്‍കോടു നിന്നുള്ള പൊലിസ് സംഘം വിട്‌ളയിലെത്തി കൂടുതല്‍ വിവരങ്ങള്‍ ശേഖരിക്കും.
മഞ്ചേശ്വരം ബാക്രബയലില്‍ താമസിക്കുന്ന ബണ്ട്വാള്‍ കൊള്‍നാട് സ്വദേശി കുഡ്ത്തമഗെരു ബാരിക്ക് (32), വിട്‌ള പതിനൂരു കൊടുങ്കായ് സ്വദേശികളായ രാധുക്കട്ടെ ബഷീര്‍ (25), കടമ്പു കൊത്രാസ് വീട്ടില്‍ അഷറഫ് (19), സൈഫുദ്ദീന്‍(19), ബണ്ട്വാള്‍ ഇറയിലെ ജാബിര്‍(20), കുഡ്‌ത്തെ മൊഗെരു കാരായി കെ സുബൈര്‍ (23) എന്നിവരാണ് കഴിഞ്ഞ ദിവസം വിട്‌ളയില്‍ അറസ്റ്റിലായത്.
ബഷീര്‍ കാസര്‍കോട്ടും മഞ്ചേശ്വരത്തും ഉള്‍പ്പെടെ ഇരുപതോളം വാഹനമോഷണ കേസുകളില്‍ പ്രതിയാണെന്ന് പൊലിസ് പറഞ്ഞു. ജാബിര്‍ മഞ്ചേശ്വരത്ത് വാഹന മോഷണ കേസില്‍ പ്രതിയാണെന്നും പൊലിസ് പറഞ്ഞു.