തിരുവമ്പാടി: 1977ന് മുന്‍പുള്ള കൈയേറ്റംപോലും അംഗീകരിച്ചു സര്‍ക്കാര്‍ പട്ടയം കൊടുക്കുമ്പോഴാണ് 71-72 നു മുന്‍പ് എല്ലാ റവന്യൂരേഖകളുമുള്ള സ്ഥലം വിലയ്ക്ക് വാങ്ങിയ മുത്തപ്പന്‍പുഴയിലെ കര്‍ഷകരെ കൈയേറ്റക്കാരായി ചിത്രീകരിച്ച് കൃഷിഭൂമിയില്‍ നിന്ന് ഇറക്കിവിടാന്‍ വനം വകുപ്പ് ശ്രമിക്കുന്നതെന്ന് എം.ഐ ഷാനവാസ് എംപി.
വനം വകുപ്പ് സര്‍വേയും ജണ്ടകെട്ടലും നടത്തുന്ന മറിപ്പുഴയിലെ പ്രദേശങ്ങള്‍ സന്ദര്‍ശിച്ച് കര്‍ഷകരുടെ പരാതി കേള്‍ക്കുകയായിരുന്നു എം.പി വിശദീകരണം ചോദിക്കുകയോ നോട്ടിസ് കൊടുക്കുകയോ ചെയ്യാതെ മറിപ്പുഴയിലെ വീടുകള്‍ മുദ്രവച്ച് ഏറ്റെടുത്ത വനം വകുപ്പ് നടപടി പ്രാകൃതമാണ്.
വകുപ്പ് മന്ത്രിയുടെ ഉത്തരവിനു പോലും വില കല്‍പിക്കാത്ത ഉദ്യോഗസ്ഥരെ നിലയ്ക്കു നിര്‍ത്താന്‍ കോടതിയുടെ ഇടപെടല്‍ ഉണ്ടാകണം.
വനം,റവന്യൂ മന്ത്രിമാര്‍ക്കു മുന്‍പില്‍ പ്രശ്‌നം അവതരിപ്പിക്കുമെന്ന് ഷാനവാസ് സൂചിപ്പിച്ചു. ഒട്ടേറെ കര്‍ഷകര്‍ റവന്യൂരേഖകളുമായി എത്തി എം.പിക്ക് നിവേദനം കൊടുത്തു. കോണ്‍ഗ്രസ് നേതാക്കളും പ്രവര്‍ത്തകരും എം.പിയെ അനുഗമിച്ചു.