പുതുക്കാട് : ശക്തമായ കാറ്റിലും മഴയിലും മിന്നലിലും പുതുക്കാട് മേഖലയില്‍ കനത്ത നാശനഷ്ടം. ചെങ്ങാലൂര്‍ സ്‌നേഹപുരത്ത് ഐനിക്കല്‍ ആനിയുടെ വീടിനു മുകളില്‍ തെങ്ങ് വീണു വീടു ഭാഗികമായി നശിച്ചു.
വീടിനകത്തു കുടുംബാംഗങ്ങള്‍ ഉണ്ടായിരുന്നെങ്കിലും പരുക്കേല്‍ക്കാതെ രക്ഷപ്പെട്ടു. പുതുക്കാട് പഞ്ചായത്ത് പതിനൊന്നാം വാര്‍ഡില്‍ തെങ്ങു വീണു വീടു നശിച്ചു. ശക്തമായ കാറ്റില്‍ പുതുക്കാട് അശോക തെങ്ങലൊടിപ്പാടം റോഡില്‍ ജാതിമരം വീണു ഇലക്ട്രിക് പോസ്റ്റ് ഒടിഞ്ഞു റോഡില്‍ വീണു വൈദ്യുതിയും ഗതാഗതവും തടസപ്പെട്ടു.
മണ്ണംപേട്ട തെക്കേക്കര തെക്കുംപുറം ലോനപ്പന്‍ മകന്‍ ഡേവീസിന്റെ വീടു ഇടിമിന്നലേറ്റു തകര്‍ന്നു. ചുമരുകള്‍ വിള്ളുകയും വൈദ്യുതോപകരണങ്ങള്‍ തകരാറിലാവുകയും ചെയ്തു. സ്വിച്ചു ബോര്‍ഡുകള്‍ മിന്നലിന്റെ ആഘാതത്തില്‍ തെറിച്ചുപോയി. ആളപായമില്ല.
മറവാഞ്ചേരി ഐനിക്കത്തറ രാമന്റെ പറമ്പിലെ തെങ്ങ് ശക്തമായ കാറ്റില്‍ വീടിനു മുകളിലേക്കു വീണു. വീടിന്റെ പിറകിലെ ഷെഡ് തകര്‍ന്നു. ചെങ്ങാലൂര്‍ സ്‌നേഹപുരം തരിശുപറമ്പ് റോഡിനു കുറുകെയും വൈദ്യുതി കമ്പികള്‍ക്കു മുകളിലേക്കും മരം വീണു. ഗതാഗതവും വൈദ്യുതിവിതരണവും ഏറെ നേരം തടസപ്പെട്ടു.