ആലക്കോട്: പാലക്കയം തട്ടില്‍ ജില്ലാ ടൂറിസം പ്രമോഷന്‍ കൗണ്‍സിലിന്റെ നേതൃത്വത്തില്‍ ഫോട്ടോ ഫ്രെയിം ഒരുങ്ങി. കലക്ടര്‍ മീര്‍ മുഹമ്മദലി ഉദ്ഘാടനം ചെയ്തു. ജില്ലയിലെ പ്രധാന വിനോദ സഞ്ചാര കേന്ദ്രങ്ങളിലേക്ക് സഞ്ചാരികളെ ആകര്‍ഷിക്കാനാണ് നൂതന പരിപാടികളുമായി ജില്ലാ ടൂറിസം പ്രമോഷന്‍ കൗണ്‍സില്‍ രംഗത്തെത്തിയിരിക്കുന്നത്. കണ്ണൂര്‍ ഐ എന്ന പേരില്‍ പയ്യാമ്പലത്താണ് ആദ്യമായി ഫോട്ടോ ഫ്രെയിം സ്ഥാപിച്ചത്. ജില്ലയിലെതന്നെ അതിമനോഹരമായ ടൂറിസം കേന്ദ്രമായ പാലക്കയം തട്ടിലെ വിവിധ ദൃശ്യങ്ങള്‍ ഒരു വലിയ ഫ്രെയിമില്‍ ഒപ്പിയെടുക്കാന്‍ സാധിക്കുമെന്നതാണ് പുതിയ പദ്ധതിയുടെ പ്രത്യേകത. പാലക്കയം തട്ടില്‍ ഇത്തരത്തില്‍ രണ്ട് വലിയ ഫ്രെയിമുകളാണ് സ്ഥാപിച്ചിട്ടുള്ളത്. ഫ്രെയിമുകളില്‍ കയറി മനോഹരങ്ങളായ ദൃശ്യങ്ങള്‍ പകര്‍ത്തുന്നവര്‍ക്ക് സമ്മാനങ്ങളും ഡി.ടി.പി.സി പ്രഖ്യാപിച്ചിട്ടുണ്ട്. നടുവില്‍ പഞ്ചായത്ത് പ്രസിഡന്റ് ബിന്ദു ബാലന്‍ അധ്യക്ഷയായി. വാര്‍ഡ് മെമ്പര്‍ ഷൈനി തോമസ്, ഡി.ടി.പി.സി സെക്രട്ടറി ജിതീഷ്, അന്‍ഷാദ് കരുവഞ്ചാല്‍, നിസാര്‍ സംസാരിച്ചു.