അങ്കമാലി: കഞ്ചാവുമായി യുവാവ് എക്‌സൈസിന്റെ പിടിയിലായി. ആലുവ ഉളിയന്നൂര്‍ കാട്ടുംപറമ്പ് വീട്ടില്‍ ബാബു മകന്‍ അരുണ്‍( 21) ആണ് അങ്കമാലി എക്‌സൈസിന്റെ പിടിയിലായത്. അരുണ്‍ ബാബുവില്‍ നിന്നും 60 ഗ്രാം കഞ്ചാവാണ് കണ്ടെത്തിയത്. നാല് വര്‍ഷമായി കഞ്ചാവ് ഉപയോഗിച്ച് വരുന്നയാളാണ് അരുണ്‍ ബാബു. തമിഴ്‌നാട്ടില്‍ നിന്നും ബസ് മാര്‍ഗമാണ് ഇയാള്‍ കഞ്ചാവ് കൊണ്ടുവരുന്നത്. കഞ്ചാവ് ചെറിയ പോളിത്തീന്‍ കവറുകളിലാക്കി ഒരു പൊതിക്ക് 500 രൂപ നിരക്കിലാണ് വില്‍ക്കുന്നത്.
അങ്കമാലി ആലുവ ഭാഗങ്ങളില്‍ സുഹൃത്തുക്കള്‍ക്കും പരിചയക്കാര്‍ക്കുമാണ് ഇയാള്‍ കഞ്ചാവ് വില്‍ക്കുന്നത്. മൊബൈല്‍ ഫോണ്‍ വഴി ഇടപാടുകാരുമായി കച്ചവടം ഉറപ്പിച്ച ശേഷം കഞ്ചാവ് സ്ഥലം മുന്‍കൂട്ടി അറിയിച്ചശേഷമാണ് ഇയാള്‍ കഞ്ചാവ് കൈമാറുന്നത്.
എറണാകുളം എക്‌സൈസ് ഇന്റലിജന്‍സ് ബ്യൂറോയിലെ പ്രിവന്റീവ് ഓഫിസറായ എം.കെ ഷാജി അങ്കമാലി ഭാഗത്ത് നടത്തിയ രഹസ്യ നീക്കത്തിലൂടെയാണ് കണ്ടെത്തിയ വിവരത്തിന്റെ അടിസ്ഥാനത്തില്‍ അങ്കമാലി എക്‌സൈസ് ഇന്‍സ്‌പെക്ടര്‍ ആര്‍. പ്രശാന്തും പാര്‍ട്ടിയുമാണ് ഇയാളെ പിടികൂടിയത്. അരുണ്‍ ബാബുവിനെ അങ്കമാലി കോടതിയില്‍ ഹാജരാക്കി. പരിശോധനയില്‍ പ്രിവന്റീവ് ഓഫിസര്‍മാരായ പി.കെ ബിജു, സിവില്‍ എക്‌സൈസ് ഓഫിര്‍മാരായ ബാലു എസ് പ്രശാന്ത് കെ.എസ്, അജി പി.എന്‍, എക്‌സൈസ് ഡ്രൈവര്‍ ബെന്നി പീറ്റര്‍ എന്നിവര്‍ പങ്കെടുത്തു.