പയ്യന്നൂര്‍: പുതിയ അധ്യയന വര്‍ഷം ആരംഭിക്കാന്‍ നാല് മാസം ശേഷിക്കെ വിദ്യാലയങ്ങളില്‍ പാഠപുസ്തകങ്ങളെത്തി. ജില്ലാ കേന്ദ്രങ്ങളിലെ ബുക്ക് ഡിപ്പൊകളില്‍ നിന്ന് പാഠപുസ്തകങ്ങളുടെ വിതരണം ആരംഭിച്ചു. നിലവില്‍ ഭൂരിഭാഗം പ്രൈമറി, ഹൈസ്‌കൂള്‍ വിദ്യാലയങ്ങളിലും പാഠപുസ്തകങ്ങള്‍ എത്തിയിട്ടുണ്ട്. ഹൈസ്‌കൂള്‍ വിഭാഗത്തില്‍ ഒന്‍പത്, പത്ത് കാസുകളിലെ മുഴുവന്‍ പാഠപുസ്തകങ്ങളും എത്തിക്കഴിഞ്ഞു. ഒന്ന് മുതല്‍ എട്ട് വരെ ക്ലാസുകളിലെ പുസ്തകങ്ങള്‍ മിക്കതും എത്തി. ഭാഷാ പുസ്തകങ്ങളാണ് ഇനി വരാനുള്ളത്. ഇവ വാര്‍ഷിക പരീക്ഷ അവസാനിക്കുന്നതിനു തൊട്ടുമുമ്പെ എത്തിക്കുമെന്നാണ് ചുമതലയുള്ള അധ്യാപകര്‍ക്ക് ലഭിച്ച വിവരം. ഒന്‍പത്, പത്ത് ക്ലാസുകളിലെ പാഠപുസ്തകങ്ങള്‍ നേരത്തെ എത്തിയത് വിദ്യാര്‍ഥികള്‍ക്കും അധ്യാപകര്‍ക്കും ഒരുപോലെ ആശ്വാസമായി. അവധിക്കാല ക്ലാസുകള്‍ നടത്താനും പാഠപുസ്തകങ്ങള്‍ വായിച്ചു നോക്കാനും ഇതുവഴി കഴിയുമെന്ന് വിദ്യാര്‍ഥികള്‍ പറയുന്നു. കഴിഞ്ഞ അധ്യയന വര്‍ഷം പാഠപുസ്തക വിതരണം തൃപ്തികരമായിരുന്നില്ല. ഇത് മറികടക്കാനാണ് വിദ്യാഭ്യാസ വകുപ്പിന്റെ ശ്രമം.