കൊച്ചി: കേരള പ്രദേശ് സ്‌കൂള്‍ ടീച്ചേഴ്‌സ് അസോസിയേഷന്‍ (കെ.പി.എസ്.ടി.എ) സംസ്ഥാന പ്രഥമാധ്യാപക ശില്‍പശാല ഹൈബി  ഈഡന്‍ എം.എല്‍.എ ഉദ്ഘാടനം ചെയ്തു. പൊതുവിദ്യാഭ്യാസത്തിന്റെ ഗുണനിലവാരം മെച്ചപ്പെടുത്തുന്നതിനും ഉറപ്പുവരുത്തുന്നതിനും മുഖ്യപങ്കുവഹിക്കേണ്ടതും സാംസ്‌കാരിക മുന്നേറ്റത്തിന് ആക്കം കൂട്ടേണ്ടതും പ്രഥമാധ്യാപകരുടെ ശ്രദ്ധാപൂര്‍വമായ ഇടപെടലിലൂടെയാവണമെന്നും എം.എല്‍.എ അഭിപ്രായപ്പെട്ടു. ശില്‍പശാലയില്‍ സംസ്ഥാന ഭാരവാഹികളായ ടി.എസ് സലീം, പി.ജെ ആന്റണി, ബിനു കെ കുഞ്ഞപ്പന്‍, കെ സരോജിനി, കെ.എ ബീന, ടി.യു സാദത്ത്, സി.കെ സാജു, സുരേഷ്, സാബു വര്‍ഗീസ്, കെ.ബി അനില്‍ കുമാര്‍, സജീവന്‍ കുഞ്ഞോത്ത് എന്നിവര്‍ സംസാരിച്ചു. സംസ്ഥാന എച്ച്.എം ഫോറം ചെയര്‍മാന്‍ വി ഉണ്ണികൃഷ്ണന്‍ അധ്യക്ഷത വഹിച്ചു.
സമാധാന പൂര്‍ണവും സുരക്ഷിതപൂര്‍ണവുമായ വിദ്യാലയ അന്തരീക്ഷത്തിന് സര്‍ക്കാര്‍ മുന്‍കയ്യെടുക്കണമെന്ന് പഠനശിബിരം പ്രമേയത്തിലൂടെ സര്‍ക്കാരിനോട് ആവശ്യപ്പെട്ടു. അധ്യാപകരുടെ കുറവും തൊഴിലിലെ സുരക്ഷിതത്വമില്ലായ്മയും ഗുണമേന്മയുള്ള വിദ്യാഭ്യാസ പ്രവര്‍ത്തനങ്ങള്‍ക്ക് തടസ്സമാകുന്നു. നിലയിലുള്ള മുഴുവന്‍ അധ്യാപകര്‍ക്കും തൊഴില്‍ സുരക്ഷയും ശമ്പളവും ഉറപ്പുവരുത്തുവാന്‍ സര്‍ക്കാര്‍ അടിയന്തിര നടപടി സ്വീകരിക്കണമെന്ന് പ്രമേയം സര്‍ക്കാരിനോട് ആവശ്യപ്പെട്ടു.