മട്ടാഞ്ചേരി:  കൊച്ചി മട്ടാഞ്ചേരി  കൊട്ടാര വളപ്പിലെ പുരാതന കുളം അധികൃത ഭരണ കൂട അവഗണനയില്‍ തകര്‍ന്ന് നശിക്കുന്നു. മട്ടാഞ്ചേരി കൊട്ടാരവളപ്പിലെ കൊച്ചി രാജകുടുംബ ആരാധ്യദേവീ പഴയന്നുര്‍ഭഗവതിയുടെ  ക്ഷേത്രക്കുളം മട്ടാഞ്ചേരിയിലെ ആറോളം ക്ഷേത്രത്തിലെ ഉത്സവ ആറാട്ടുകുളമായിരുന്നു.
കൊച്ചി ദേവസ്വം ബോര്‍ഡിന്റെ അനാസ്ഥയും പുരാവസ്തു വകുപ്പിന്റെ എതിര്‍പ്പും സംസ്ഥാന ജില്ല ഭരണ കുടങ്ങളുടെ അവഗണനയും മൂലം 57 സെന്റ സ്ഥല വിസ്തൃതിയിലുള്ള ജില്ലയിലെ പഴക്കമാര്‍ന്നതും  പശ്ചിമകൊച്ചിയിലെ വിസ്തൃതവുമായ ജലാശയമാണ് നശിപ്പിക്കപ്പെടുന്നത്.
മഴയത്ത് ജലനിരപ്പുയര്‍ന്ന ക്ഷേത്രക്കുളത്തിന്റെ കുളക്കടവിലെ ചവിട്ടുപടികള്‍ തകര്‍ന്നും ചുറ്റുമതിലുകള്‍ ഇടിഞ്ഞു വീണും അപകട ഭീതിയുണര്‍ത്തുകയാണ്. കൊട്ടാരം കാണാന്‍ പ്രതിദിനമെത്തുന്ന നൂറുക്കണക്കിന് വിനോദ സഞ്ചാരികള്‍ക്കും ക്ഷേത്രവളപ്പിലെ താമസക്കാര്‍ക്കും സ്‌കുള്‍ വിദ്യാര്‍ത്ഥികള്‍ക്കും കൊട്ടാരക്ഷേത്ര വീഥിയിലെ തകര്‍ന്ന കുളം രാപകലെന്നപ്പോലെ ഭീതിയാണുയര്‍ത്തുന്നത് . അഞ്ച് വര്‍ഷം മുമ്പ് കുളത്തിന്റെ തെക്ക് ദിക്കിലെ ഭിത്തി ഇടിഞ്ഞു വീണു. തുടര്‍ന്ന് ഓരോരോ ഘട്ടങ്ങളിലായി വിവിധ ഭാഗങ്ങളിലെ ഭിത്തികള്‍ തകരുകയും ചെയ്തു.
കൊട്ടാര കൈവശക്കാരായ പുരാവസ്തു വകുപ്പ് ക്ഷേത്രക്കുളനവീകരണത്തിന് നീതികരണമില്ലാത്ത എതിര്‍പ്പ് പ്രകടിപ്പിക്കുകയാണന്ന് ഭക്തജന സംഘടനകള്‍ പറയുന്നു. കേന്ദ്ര സര്‍ക്കാറിന്റെ ജലാശയ സംരക്ഷണ പദ്ധതിയില്‍പ്പെടുത്തി 25 ലക്ഷം രൂപയുടെ നവീകരണ പദ്ധതി തയ്യാറാക്കിയെങ്കിലും മുന്‍ എം.എല്‍.എ.യുടെ അശ്രദ്ധമൂലം ഇതും ലഭ്യമായില്ല. ജില്ലയിലെ പഴയകാല ജലാശയ സംരക്ഷിത പദ്ധതിയില്‍പ്പെടുത്തി ജന സഹകരണത്തോടെയുള്ള നവീകരണത്തില്‍ ജില്ലാ ഭരണകൂടവും ആനവാതില്‍ ക്ഷേത്രക്കുളത്തെ അവഗണിച്ചു.
മട്ടാഞ്ചേരിയിലെ അഗ്‌നിശമന സേനയ്ക്ക് ജലലഭ്യത ഉറപ്പാക്കുന്ന ക്ഷേത്രക്കുളം സംരക്ഷണത്തിന് ജനകീയ പ്രക്ഷോഭത്തിനൊരുങ്ങുകയാണ് സാംസ്‌ക്കാരികസാമുഹൃസംഘടനകള്‍ ' ക്ഷേത്രക്കുളനവീകരണം അടിയന്തിരമായി നടത്തണമെന്ന് ക്ഷേത്ര ക്ഷേമസമിതിയും ബന്ധപ്പെട്ടവരോട് ആവശ്യപ്പെട്ടു.