കൊച്ചി: തിരുവല്ല-ചങ്ങാനേശരി സ്റ്റേഷനുകള്‍ക്കിടയില്‍ ട്രാക്ക് ഇരട്ടിപ്പിക്കലിന്റെ ഭാഗമായി യാര്‍ഡ് പുനക്രമീകരണ പ്രവര്‍ത്തനങ്ങള്‍ നടക്കുന്നതിനാല്‍ തിങ്കള്‍, ചൊവ്വ ദിവസങ്ങളില്‍ ഈ റൂട്ടുകളിലൂടെയുള്ള ട്രെയിന്‍ സര്‍വീസുകള്‍ക്ക് നിയന്ത്രണമേര്‍പ്പെടുത്തി.
എറണാകുളം കായംകുളം പാസഞ്ചര്‍, കായംകുളം എറണാകുളം പാസഞ്ചര്‍, കൊല്ലം കോട്ടയം പാസഞ്ചര്‍, കോട്ടയം കൊല്ലം പാസഞ്ചര്‍ എന്നീ ട്രെയിനുകള്‍ റദ്ദാക്കി. ഗുരുവായൂര്‍ പുനലൂര്‍ പാസഞ്ചറിന്റെയും പുനലൂര്‍ ഗുരുവായൂര്‍ പാസഞ്ചറിന്റെയും സര്‍വീസുകള്‍ കോട്ടയം പുനലൂര്‍ റൂട്ടില്‍ ഭാഗികമായി റദ്ദാക്കി.
കന്യാകുമാരി മുംബൈ സി.എസ്.ടി എക്‌സ്പ്രസ്, കണ്ണൂര്‍ തിരുവനന്തപുരം ജന്‍ശതാബ്തി എക്‌സ്പ്രസ്, ഡല്‍ഹി തിരുവനന്തപുരം കേരള എക്‌സ്പ്രസ് എന്നീ ട്രെയിനുകള്‍ ആലപ്പുഴ വഴി തിരിച്ചു വിടും. രാവിലെ 11.10ന് കൊല്ലത്ത് നിന്നു പുറപ്പെടേണ്ട കൊല്ലം-കോട്ടയം-എറണാകുളം ഡെമു ഈ ദിവസങ്ങളില്‍ ഉച്ചക്ക് 12.30നാണ് സര്‍വീസ് തുടങ്ങുക.