കൊയിലാണ്ടി: 60 പൊതി ബ്രൗണ്‍ഷുഗറുമായി പയ്യോളി സ്വദേശിയെ കൊയിലാണ്ടി എക്‌സൈസ് പിടികൂടി. പൊക്കിണിന്റവിട നവാസിനെയാണ് അറസ്റ്റ് ചെയ്തത്. കൊയിലാണ്ടി എക്‌സൈസ് ഇന്‍സ്‌പെക്ടര്‍ പി. സജിത്ത്കുമാറിന് ലഭിച്ച രഹസ്യവിവരത്തെ തുടര്‍ന്ന് ദിവസങ്ങളോളം ഇയാള്‍ നിരീക്ഷണത്തിലായിരുന്നു. പയ്യോളി ഫെഡറല്‍ ബാങ്കിന് സമീപംവെച്ചാണ് ഇയാളെ പിടികൂടിയത്. പയ്യോളി, കൊയിലാണ്ടി ഭാഗങ്ങളില്‍ ബ്രൗണ്‍ഷുഗര്‍ എത്തിക്കുന്ന കണ്ണികളില്‍ ഒരാളാണ് നവാസ്.
 സംഘത്തിലെ പ്രധാന കണ്ണിയെ കുറിച്ച് വിവരം ലഭിച്ചതായി എക്‌സൈസ് ഇന്‍സ്‌പെക്ടര്‍ പറഞ്ഞു. റെയ്ഡിന് അസി. എക്‌സൈസ് ഇന്‍സ്‌പെക്ടര്‍ മനോഹരന്‍, പ്രിവന്റീവ് ഓഫിസര്‍ പി. സുരേഷ് കുമാര്‍, സി.ഇ.ഒ മാരായ റഷീദ്, ഷിജു, മധുസൂദനന്‍, സുരേന്ദ്രന്‍, ഡ്രൈവര്‍ ബിബിനീഷ് നേതൃത്വം നല്‍കി. മയക്കുമരുന്ന് വില്‍പ്പനക്കെതിരെ ശക്തമായ നടപടികള്‍ സ്വീകരിക്കുന്നതിന്റെ ഭാഗമായി ഏതാനും ദിവസം മുമ്പ് 460 ടാബ്ലറ്റുകളും പിടിച്ചെടുത്തിരുന്നു. കോടതിയില്‍ ഹാജരാക്കിയ ഇയാളെ റിമാന്‍ഡ് ചെയ്തു.