മുംബൈ: കേന്ദ്രത്തില്‍ ബി.ജെ.പി അധികാരമേറ്റതും മുതല്‍ പരസ്യത്തിനായി മാത്രം ചെലവഴിച്ചത് 4,343.26 കോടി രൂപ. മുംബൈ സ്വദേശിയായ അനില്‍ ഗല്‍ഗലി വിവരാവകാശ നിയമപ്രകാരം നല്‍കിയ ചോദ്യത്തിനുള്ള മറുപടിയായിട്ടാണ് ഈ വിവരം ലഭ്യമായത്. മോദി സര്‍ക്കാര്‍ അധികാരമേറ്റത് മുതല്‍ പരസ്യങ്ങള്‍ വിതരണം ചെയ്യുന്ന ബ്യൂറോ ഓഫ് ഔട്ട്‌റീച്ച് ആന്‍ഡ് കമ്മ്യൂണിക്കേഷനാണ് (ബി.ഒ.സി) വിവരങ്ങള്‍ നല്‍കിയത്.
2014- ജൂണ്‍ മുതല്‍ 2015 മാര്‍ച്ച് വരെ 424.85 കോടി രൂപ അച്ചടി മാധ്യമങ്ങള്‍ക്കും 448.97 കോടി രൂപ ഇലക്ട്രോണിക് മാധ്യമങ്ങള്‍ക്കും 79.72 കോടി മറ്റു പരസ്യങ്ങള്‍ക്കും ചെലവഴിച്ചു. 2015-2016 കാലയളവില്‍ പരസ്യങ്ങള്‍ക്ക് ചെലവാക്കുന്ന തുകയില്‍ വന്‍വര്‍ധനവാണുണ്ടായത്. 510.69 കോടി അച്ചടി മാധ്യമങ്ങള്‍, 541.99 കോടി ഇലക്ടോണിക് മാധ്യമങ്ങള്‍, 118.43 കോടി മറ്റു പരസ്യങ്ങള്‍ക്കുമായി ചെലവഴിച്ചു.
2016-2017 കാലയളവില്‍ ആകെ 1,263 കോടി രൂപയാണ് പരസ്യത്തിനായി ചെലവഴിച്ചത്. അച്ചടി മാധ്യമങ്ങള്‍ക്ക് 463.38 കോടി രൂപ ചെലവഴിച്ചു. എന്നാല്‍ ഇലക്ടോണിക് മാധ്യമങ്ങള്‍ക്കുള്ള 613.78 കോടിയായി വര്‍ധിച്ചു. മറ്റു പരസ്യങ്ങള്‍ക്ക് 185.99 കോടി ചെലവഴിച്ചു.
2017 ഏപ്രില്‍-2018 മാര്‍ച്ച് വരെ ഇലക്ട്രോണിക് മാധ്യമങ്ങള്‍ക്കുള്ള പരസ്യങ്ങള്‍ക്ക് ഇടിവ് വന്നു. 475.13കോടിയായണ് ഇതിനായി ചെലഴിച്ചത്. അച്ചടി മാധ്യമങ്ങള്‍ക്ക് 333.23 കോടിയും മറ്റു പരസ്യങ്ങള്‍ക്കായി 147.10 കോടിയും ചെലവഴിച്ചു.