ലണ്ടന്‍: ഇംഗ്ലീഷ് കരുത്തരായ മാഞ്ചസ്റ്റര്‍ യുനൈറ്റഡ് യൂറോപ്പ ലീഗിന്റെ ക്വാര്‍ട്ടറിലെത്തി. ഇരു പാദ പ്രീ ക്വാര്‍ട്ടറില്‍ റഷ്യന്‍ ക്ലബ് റോസ്റ്റോവിനെ 2-1നു പരാജയപ്പെടുത്തിയാണു മാഞ്ചസ്റ്റര്‍ മുന്നേറിയത്.
ആദ്യ പാദ പോരാട്ടത്തില്‍ 1-1നു സമനില വഴങ്ങി രണ്ടാം പാദത്തിനായി സ്വന്തം തട്ടകത്തില്‍ പോരിനിറങ്ങിയ മാഞ്ചസ്റ്റര്‍ മറുപടിയില്ലാത്ത ഒറ്റ ഗോളിനു വിജയിച്ചാണു അവസാന എട്ടിലിടം കണ്ടത്. മാഞ്ചസ്റ്ററിനായി വിജയ ഗോള്‍ യുവാന്‍ മാറ്റ 70ാം മിനുട്ടില്‍ നേടി. ക്വാര്‍ട്ടറില്‍ ബെല്‍ജിയം ക്ലബ് ആന്റര്‍ലെറ്റാണ് മാഞ്ചസ്റ്ററിന്റെ എതിരാളികള്‍.
മറ്റൊരു മത്സരത്തില്‍ ഇറ്റാലിയന്‍ കരുത്തരായ റോമ ഒളിംപിക്ക് ലിയോണിനെതിരായ രണ്ടാം പാദം 2-1നു വിജയിച്ചെങ്കിലും ആദ്യ പാദത്തില്‍ 4-2ന്റെ തോല്‍വി വഴങ്ങി ഇരു പാദങ്ങളിലുമായി 5-4നു മത്സരം അടിയറ വച്ച് പുറത്തേക്കുള്ള വഴി കണ്ടു.
ജര്‍മന്‍ ടീമുകളായ ഷാല്‍കെയും ബൊറൂസിയ മോണ്‍ചെന്‍ഗ്ലെഡ്ബാച് പോരാട്ടം 2-2നു സമനിലയില്‍ അവസാനിച്ചു. ആദ്യ പാദം 1-1നു ഒപ്പം പിരിഞ്ഞിരുന്നു. ഇരു പാദങ്ങളിലുമായി മത്സരം 3-3നു സമനിലയായെങ്കിലും എവേ ഗോളിന്റെ ബലത്തില്‍ ഷാല്‍കെ ക്വാര്‍ട്ടറിലെത്തി.
മറ്റു അയാക്‌സ് 2-0ത്തിനു വിജയിച്ച് ഇരു പാദങ്ങളിലായി 3-2നും ആന്റര്‍ലെറ്റ് രണ്ടാം പാദം 1-0ത്തിനു വിജയിച്ച് ഇരു പാദങ്ങളിലായി 2-0ത്തിനും മത്സരം സ്വന്തമാക്കി ക്വാര്‍ട്ടര്‍ ബര്‍ത്ത് ഉറപ്പിച്ചു.