ദോഹ: പുതിയ വാഹനങ്ങളില്‍ ഇന്ധന ക്ഷമതാ ലേബലുകള്‍ നിര്‍ബന്ധമാക്കിയതായി സാമ്പത്തിക വാണിജ്യ മന്ത്രാലയം. വാഹനങ്ങളുടെ ഇന്ധന കാര്യക്ഷമതയെക്കുറിച്ച് ഉപഭോക്താക്കള്‍ക്കിടയില്‍ അവബോധം സൃഷ്ടിക്കുകയാണ് ലക്ഷ്യം.
2017 മോഡല്‍ വാഹനങ്ങളില്‍ ഇന്ധന ക്ഷമതാ ലേബലുകള്‍ പതിപ്പിക്കണമെന്ന് വാഹന ഏജന്റുമാരോടും ഡീലര്‍മാരോടും ആവശ്യപ്പെട്ടിട്ടുണ്ട്.
നിയമം ലംഘിക്കുന്നവര്‍ക്കെതിരേ കര്‍ശന നടപടികള്‍ സ്വീകരിക്കും. ഇന്ധനവില കുറവായതിനാല്‍ കാര്യക്ഷമതയെക്കുറിച്ച് ആരും ശ്രദ്ധിക്കാത്ത സാഹചര്യമാണുള്ളത്. വാഹനങ്ങളില്‍ ലേബല്‍ പതിപ്പിക്കുന്നതിലൂടെ കാര്യക്ഷമതയെക്കുറിച്ച് ബോധവാന്മാരാവുകയും ഉയര്‍ന്ന ഇന്ധന കാര്യക്ഷമതയുള്ള വഹനങ്ങള്‍ ഉപയോഗിക്കാനും സാധിക്കും.
ജിസിസി സ്റ്റാന്‍ഡേഡൈസേഷന്‍ ഓര്‍ഗനൈസേഷന്‍ വ്യവസ്ഥകള്‍ പ്രകാരമുള്ള ഇന്ധന കാര്യക്ഷമതയെക്കുറിച്ച് ഉപഭോക്താക്കളെ ബോധവല്‍ക്കരിക്കണമെന്നും മന്ത്രാലയം അറിയിച്ചു.