തിരുവനന്തപുരം: ലഹരിവിരുദ്ധ ബോധവല്‍ക്കരണ പ്രവര്‍ത്തനരംഗത്ത് മികച്ച പ്രവര്‍ത്തനം കാഴ്ചവച്ച സ്‌കൂള്‍- കോളജ് ലഹരിവിരുദ്ധ ക്ലബുകള്‍, സ്‌കൂള്‍- കോളജ് ലഹരിവിരുദ്ധ ക്ലബംഗങ്ങള്‍, മികച്ച സന്നദ്ധ പ്രവര്‍ത്തകന്‍ എന്നീ വിഭാഗങ്ങളില്‍ എക്‌സൈസ് വകുപ്പ് നല്‍കുന്ന അവാര്‍ഡുകള്‍ വി.ജെ.ടി ഹാളില്‍ ഇന്ന് രാവിലെ 11 മണിക്ക് മുഖ്യമന്ത്രി പിണറായി വിജയന്‍ വിതരണം ചെയ്യും.
സ്‌കൂള്‍തലത്തിലെ മികച്ച ലഹരിവിരുദ്ധ ക്ലബായി കണ്ണൂര്‍ പേരാവൂരിലെ തൊണ്ടിയില്‍ സെന്റ്‌ജോസഫ്‌സ് ഹയര്‍സെക്കന്‍ഡറി സ്‌കൂളിലെ ലഹരിവിരുദ്ധ ക്ലബിനെയും കോളജ് തലത്തിലെ മികച്ച ലഹരിവിരുദ്ധ ക്ലബായി കോഴിക്കോട്ടെ ജെ.ഡി.ടി ഇസ്‌ലാം ആര്‍ട്‌സ് ആന്‍ഡ് സയന്‍സ് കോളജിലെ ലഹരിവിരുദ്ധ ക്ലബിനെയും തെരഞ്ഞെടുത്തു. മികച്ച സ്‌കൂള്‍ ലഹരിവിരുദ്ധ ക്ലബ് അംഗമായി കാഞ്ഞിരപ്പളളി സെന്റ് ഡൊമനിക് ഹയര്‍സെക്കന്‍ഡറി സ്‌കൂളിലെ ഡിംപിള്‍ മരിയ ഡൊമനിക്കും കോളജ് ലഹരിവിരുദ്ധ ക്ലബ് അംഗമായി കൊട്ടാരക്കര സെന്റ് ഗ്രിഗോറിയസ് കോളജിലെ ഷെറിന്‍ പി ജോസഫും തെരഞ്ഞെടുക്കപ്പെട്ടു.
മികച്ച സന്നദ്ധ പ്രവര്‍ത്തകനായി എം സ്റ്റാര്‍ ചാരിറ്റബിള്‍ സൊസൈറ്റി പ്രവര്‍ത്തകനും എറണാകുളം കലൂര്‍ സെന്റ് അഗസ്റ്റിന്‍സ് സ്‌കൂളിലെ കുട്ടിപ്പട്ടാളം ലഹരിവിരുദ്ധ ക്ലബ് കണ്‍വീനറുമായ എന്‍.ടി റാല്‍ഫിയെയും മികച്ച സന്നദ്ധ സംഘടനയായി ചങ്ങനാശേരി ചെത്തിപ്പുഴ കുരിശുംമൂട് സര്‍ഗക്ഷേത്ര ചാരിറ്റബിള്‍ ട്രസ്റ്റിനെയും തെരഞ്ഞെടുത്തു.