ജിദ്ദ: വിഷന്‍ 2030 പദ്ധതിയുടെ ഭാഗമായി സഊദിയില്‍ രൂപീകരിച്ച സ്ട്രാറ്റജിക് പാര്‍ട്ണര്‍ഷിപ് ഓഫിസ് (എസ്.പി.ഒ) സേവനം ഇന്ത്യയും സഊദിയും തമ്മിലുള്ള വ്യാപാര, വാണിജ്യ ബന്ധം കൂടുതല്‍ ശക്തിപ്പെടുത്തുമെന്ന് ഇന്ത്യന്‍ അംബാസഡര്‍ അഹമ്മദ് ജാവേദ് പറഞ്ഞു.

ഇരുരാജ്യങ്ങളുടെ പ്രതിനിധികളുടെ പരസ്പര സന്ദര്‍ശനത്തിനും ഇത് ഏറെ ഉപകരിക്കും. വിവിധ മേഖകളില്‍ വിദേശ രാജ്യങ്ങളുമായുള്ള ബന്ധം മെച്ചപ്പെടുത്തുന്നതിന് രൂപീകരിച്ച എസ്.പി.ഒയില്‍ ഉള്‍പ്പെടുന്ന എട്ടു രാജ്യങ്ങളില്‍ ഒന്നാണ് ഇന്ത്യ.

ഇതു ജനാദ്രിയ ഫെസ്റ്റിവലില്‍ സൗഹൃദ രാജ്യമായി ഇന്ത്യയെ അംഗീകരിച്ചതുപോലെ വ്യാപാര, വാണിജ്യ രംഗത്തും ഇന്ത്യക്കു ലഭിച്ച അംഗീകാരമാണെന്ന് അംബാസഡര്‍ പറഞ്ഞു. ജിദ്ദ ഇന്ത്യന്‍ കോണ്‍സുലേറ്റിനു കീഴിലെ സഊദി ഇന്ത്യന്‍ ബിസനസ് നെറ്റ്‌വര്‍ക് (എസ്.ഐ.ബി.എന്‍) വാര്‍ഷിക സംഗമത്തില്‍ സംസാരിക്കുകയായിരുന്നു അദ്ദേഹം.

മേക് ഇന്‍ ഇന്ത്യ പദ്ധതിയിലൂടെയും വിഷന്‍ 2030 പദ്ധതിയിലൂടെയും ഇരു രാജ്യങ്ങളിലേയും സംരംഭകര്‍ക്ക് നിക്ഷേപത്തിന് ഒട്ടേറെ അവസരങ്ങള്‍ തുറന്നു കിട്ടിയിരിക്കുകയാണെന്നും ഇതു പരമാവധി പ്രയോജനപ്പെടുത്തണമെന്നും അംബാസഡര്‍ ആവശ്യപ്പെട്ടു.

പ്രതിരോധം, വിദ്യാഭ്യാസം, ആരോഗ്യം തുടങ്ങിയ മേഖലകളിലാണ് കൂടുതല്‍ അവസരങ്ങള്‍ ഉണ്ടായിട്ടുള്ളത്. വൈദഗ്ധ്യമുള്ളതും അല്ലാത്തതുമായവരുടെ തൊഴില്‍ സാധ്യതകളും വര്‍ധിച്ചിരിക്കുകയാണ്. സ്വദേശികളായ സംരംഭകര്‍ക്ക് തേയില, കോഫി മേഖലകളിലും അതുപോലുള്ള മറ്റു മേഖലകളിലും സാധ്യതകള്‍ ഏറെയാണ്. ഇതുമായി ബന്ധപ്പെട്ട ഏതു സഹായത്തിനും തങ്ങള്‍ തയാറാണ്.

ഇന്ത്യ സന്ദര്‍ശിക്കാന്‍ ആഗ്രഹിക്കുന്നവര്‍ക്ക് ആവശ്യമായ എല്ലാ സഹായങ്ങളും നല്‍കുമെന്നും അംബാസഡര്‍ പറഞ്ഞു. സംരംഭകര്‍ക്ക് ഇന്ത്യയില്‍ നിക്ഷേപം നടത്തുന്നതിനും ഇന്ത്യ സന്ദര്‍ശനം എളുപ്പമാക്കുന്നതിനും അഞ്ച് വര്‍ഷത്തെ ബിസിനസ് വിസ നല്‍കുന്ന കാര്യം സജീവ പരിഗണനയിലാണെന്ന് കോണ്‍സല്‍ ജനറല്‍ മുഹമ്മദ് നൂര്‍ റഹ്മാന്‍ ശൈഖ് വ്യക്തമാക്കി.

ഹസ്സന്‍ മഹസ്‌നി ലോ ഫേം സീനിയര്‍ കണ്‍സള്‍ട്ടന്റ് രാഹുല്‍ ഗോസ്വാമി സഊദിയിലെ നിയമ മാറ്റങ്ങളും നിക്ഷേപ സാധ്യതകളുടെ വളര്‍ച്ചയെയും കുറിച്ച് പ്രഭാഷണം നടത്തി. വാണിജ്യ വിഭാഗം കോണ്‍സല്‍ ഡോ. മുഹമ്മദ് നൂറുല്‍ ഹസന്‍ പ്രഭാഷണം നടത്തി. ജനറല്‍ സെക്രട്ടറി ഗസ്‌നഫര്‍ അലി സാക്കി സ്വാഗതവും ട്രഷറര്‍ വിജയ് സോണി നന്ദിയും പറഞ്ഞു. അബ്ദുല്‍ ഗഫൂര്‍ ഡാനിഷ് അവതാരകനായിരുന്നു.