കൊണ്ടോട്ടി: റിയാദില്‍ നിന്നും കരിപ്പൂരിലെത്തിയ യാത്രക്കാരനില്‍ നിന്ന് 44.48 ലക്ഷത്തിന്റെ സ്വര്‍ണം എയര്‍കസ്റ്റംസ് ഇന്റലിജന്‍സ് പിടികൂടി. കോഴിക്കോട് സ്വദേശി പാലക്കം കുഴിയില്‍ മുഹമ്മദ് എന്ന യാത്രക്കാരനില്‍ നിന്നാണ് 1399 ഗ്രാം സ്വര്‍ണം പിടികൂടിയത്. എയര്‍ഇന്ത്യ എക്‌സ്പ്രസ് വിമാനത്തിലാണ് ഇയാള്‍ ഇന്നലെ പുലര്‍ച്ചെ കരിപ്പൂരിലെത്തിയത്. കസ്റ്റംസ് ഉദ്യോഗസ്ഥര്‍ ബാഗ് തുറന്ന് പരിശോധിച്ചപ്പോഴാണ് 12 സ്വര്‍ണ ബിസ്‌ക്കറ്റുകള്‍ കണ്ടെത്തിയത്. ബാഗിലുണ്ടായിരുന്ന എല്‍.ഇ.ഡി എമര്‍ജന്‍സി ലാംപിന്റെ റീചാര്‍ജ് ബാറ്ററിക്കുള്ളിലായാണ് ഒളിപ്പിച്ചിരുന്നത്. പിടികൂടിയ സ്വര്‍ണത്തിന് മാര്‍ക്കറ്റില്‍ 44,48,820 രൂപ വിലലഭിക്കും.