തിരുവനന്തപുരം: കേരളത്തിലെ വിവിധ ഐ.ടി പാര്‍ക്കുകളില്‍ ഇടം തേടി കൂടുതല്‍ കമ്പനികളെത്തുന്നു. അടുത്തിടെയായി റെക്കോഡ് വേഗത്തിലാണ് സൈബര്‍ പാര്‍ക്കുകളിലെ സ്ഥലം കമ്പനികള്‍ സ്വന്തമാക്കുന്നത്. ഐ. ടി. മേഖലയില്‍ പുതിയതായുണ്ടായ കുതിപ്പും സൗഹൃദാന്തരീക്ഷവുമാണ് കമ്പനികളെ ആകര്‍ഷിക്കുന്ന പ്രധാന ഘടകം. തിരുവനന്തപുരം ടെക്‌നോപാര്‍ക്കില്‍ ഒന്നാംഘട്ടത്തില്‍ 104 കമ്പനികളും മൂന്നാംഘട്ടത്തില്‍ 97 കമ്പനികളും സ്ഥലത്തിനായി കാത്തിരിക്കുകയാണ്. രണ്ടു വര്‍ഷത്തിനിടെ 45 ലക്ഷം ചതുരശ്ര അടി സ്ഥലമാണ് ഐ.ടി പാര്‍ക്കുകളില്‍ കമ്പനികള്‍ ഏറ്റെടുത്തത്.
കൊച്ചി ഇന്‍ഫോപാര്‍ക്കിലെ ജ്യോതിര്‍മയ, കോഴിക്കോട് സൈബര്‍ പാര്‍ക്കിലെ സഹ്യ എന്നീ കെട്ടിടങ്ങളില്‍ സ്ഥലത്തിനായി നിരവധി കമ്പനികളാണ് അവസരത്തിനായി കാത്തിരിക്കുന്നത്. ഒന്‍പത് നിലകളുള്ള ജ്യോതിര്‍മയി കെട്ടിടത്തിലെ ആറു നിലകളും കമ്പനികള്‍ ഏറ്റെടുത്തു. നാലു നിലകളിലുള്ള സഹ്യയില്‍ മൂന്നു ലക്ഷം ചതുരശ്ര അടി സ്ഥലത്ത് എട്ടു കമ്പനികള്‍ എത്തിയിട്ടുണ്ട്. ഇവിടെ നിലവില്‍ 260 പേര്‍ ജോലി ചെയ്യുന്നുണ്ട്. കുറഞ്ഞ നാളുകള്‍ക്കുള്ളില്‍ ഇരു കെട്ടിടങ്ങളുടെയും 50 ശതമാനം സ്ഥലവും ഐ.ടി കമ്പനികള്‍ ഏറ്റെടുത്തുവെന്ന പ്രത്യേകതയുമുണ്ട്. ജ്യോതിര്‍മയിയില്‍ നിലവില്‍ 22 കമ്പനികള്‍ പ്രവര്‍ത്തിക്കുന്നു. ആയിരം ജീവനക്കാരുണ്ട്.
പള്ളിപ്പുറം ടെക്‌നോസിറ്റിയില്‍ അടുത്ത വര്‍ഷം ഏപ്രില്‍ മാസത്തോടെ രണ്ടു ലക്ഷം ചതുരശ്ര അടി സ്ഥലം തയാറാകും. ടെക്‌നോപാര്‍ക്കിലെ ഗായത്രി എന്ന കെട്ടിടത്തിന് മുകളിലായി 25,000 ചതുരശ്ര അടി സ്ഥലം അടുത്തിടെ ഒരുക്കി സ്റ്റാര്‍ട്ടപ്പ് കമ്പനികള്‍ക്കായി നല്‍കിയിട്ടുണ്ട്. പാര്‍ക്ക് സെന്ററിന് താഴെയായി 10,000 ചതുരശ്ര അടിയും ഒരുക്കിയിട്ടുണ്ട്. സ്മാര്‍ട്ട് സിറ്റിയും ഊരാളുങ്കല്‍ സൈബര്‍ പാര്‍ക്കും പൂര്‍ണ സജ്ജമാകുന്നതോടെ കൂടുതല്‍ കമ്പനികള്‍ കേരളത്തിലെത്തുമെന്നാണ് പ്രതീക്ഷ. ഊരാളുങ്കല്‍ സൈബര്‍ പാര്‍ക്കില്‍ 33 കമ്പനികള്‍ക്ക് സ്ഥലം ലഭിക്കും. ഇവിടെ ആയിരം പേര്‍ക്കെങ്കിലും തൊഴില്‍ ലഭിക്കുമെന്നാണ് കരുതുന്നത്.
കോഴിക്കോട് സൈബര്‍ പാര്‍ക്ക് ആദ്യത്തെ വൈഫൈ കാംപസ് ആകാനൊരുങ്ങുകയാണ്. യു.എസില്‍ നിന്നുള്ള ഓണ്‍ടാഷ് ഇന്ത്യ ടെക്‌നോളജീസ് പ്രൈവറ്റ് ലിമിറ്റഡ് 50 സെന്റ് സ്ഥലം ഏറ്റെടുക്കാന്‍ മുന്നോട്ടു വന്നിട്ടുണ്ട്. സൈബര്‍ പാര്‍ക്കില്‍ 50,000 ചതുരശ്ര അടിയുടെ പുതിയ കെട്ടിടം നിര്‍മിക്കാന്‍ അനുമതിയായിട്ടുണ്ട്. സൈബര്‍ പാര്‍ക്കില്‍ മൊബൈല്‍ ടെക്‌നോളജി ഹബിനും ഇന്‍ഫോപാര്‍ക്കില്‍ ഇന്റര്‍നെറ്റ് ഓഫ് തിങ്‌സിനും ടെക്‌നോസിറ്റിയില്‍ ഫിനാന്‍സ്, സൈബര്‍ സ്‌പേസ്, ബ്‌ളോക്ക് ചെയിന്‍, സൈബര്‍ സെക്യൂരിറ്റി എന്നിവയ്ക്കും പ്രധാന്യം നല്‍കിയുള്ള പദ്ധതികള്‍ നടപ്പാക്കാനാണ് സര്‍ക്കാര്‍ ആലോചിക്കുന്നത്. സൈബര്‍ പാര്‍ക്കില്‍ മൊബൈല്‍ ഇന്‍കുബേഷന്‍ സെന്ററിനായി 12,500 ചതുരശ്ര അടി സ്ഥലമാണ് തയാറാക്കുന്നത്.