മലപ്പുറം: കര്‍ണാടകയില്‍ തെരഞ്ഞെടുപ്പിന് മുന്‍പ് കോണ്‍ഗ്രസ്-ജെ.ഡി.യു സഖ്യം സാധ്യമായിരുന്നെങ്കില്‍ ബി.ജെ.പിക്ക് ഒന്നും ചെയ്യാനാകില്ലായിരുന്നെന്ന് മുസ്്‌ലിം ലീഗ്. എന്നാല്‍ ഫലം പുറത്തുവന്നയുടനെ സോണിയാഗാന്ധിയുടെ ഇടപെടലും ജെ.ഡി.യുവിന് പിന്തുണ നല്‍കാനുള്ള തീരുമാനവും ബി.ജെ.പി കേന്ദ്രങ്ങളെ ഞെട്ടിച്ചിരിക്കുകയാണെന്നും മുസ്്‌ലിം ലീഗ് ഉന്നതാധികാര സമിതി യോഗം വിലയിരുത്തി.
തീരുമാനം വിജയിച്ചാലും ഇല്ലെങ്കിലും അഭിനന്ദനാര്‍ഹമാണ്. പ്രതീക്ഷ നല്‍കുന്ന തീരുമാനമാണിത്. ബി.ജെ.പി മുക്ത ഇന്ത്യ എന്ന മുദ്രാവാക്യവുമായാണ് മുന്നോട്ടുപോകേണ്ടത്. കോണ്‍ഗ്രസാണ് ഇതിന് മുന്‍കൈയെടുക്കേണ്ടത്. കൂടുതല്‍ ഊര്‍ജസ്വലതയോടെ കോണ്‍ഗ്രസ് മുന്നിട്ടിറങ്ങണം. മുഴുവന്‍ മതേതര കക്ഷികളേയും ഒന്നിപ്പിച്ചുനിര്‍ത്തിയാല്‍ ഒരു സംസ്ഥാനത്തും ബി.ജെ.പിക്ക് സ്വാധീനമുണ്ടാക്കാനാകില്ലെന്നും യോഗം വിലയിരുത്തി.
കേരളത്തിലും ഒറ്റക്കെട്ടായി മുന്നിട്ടിറങ്ങണം. കേരള കോണ്‍ഗ്രസ് യു.ഡി.എഫിനൊപ്പമുണ്ടാകണമെന്നും തീരുമാനം വിശദീകരിച്ച് ദേശീയ ജനറല്‍ സെക്രട്ടറി പി.കെ കുഞ്ഞാലിക്കുട്ടി എം.പി പറഞ്ഞു. ചെങ്ങന്നൂരില്‍ കേരള കോണ്‍ഗ്രസ് യു.ഡി.എഫിനെ പിന്തുണക്കുമെന്ന വിശ്വാസമുണ്ട്. അവര്‍ക്ക് യു.ഡി.എഫ് സംസ്‌കാരമാണുള്ളതെന്നും കുഞ്ഞാലിക്കുട്ടി പറഞ്ഞു. ശശി തരൂരിനെതിരേ തെളിവില്ലാതെ തള്ളിക്കളഞ്ഞ കേസില്‍ ഇപ്പോള്‍ പ്രേരണാക്കുറ്റം ചുമത്തിയത് രാഷ്ട്രീയ പകപോക്കലാണ്. ഇത് അപലപനീയമാണെന്നും അദ്ദേഹം പറഞ്ഞു. സംസ്ഥാന പ്രസിഡന്റ് ഹൈദരലി തങ്ങള്‍ അധ്യക്ഷത വഹിച്ചു. ദേശീയ ഓര്‍ഗനൈസിംഗ് സെക്രട്ടറി, ഇ.ടി മുഹമ്മദ് ബഷിര്‍ എം.പി, സംസ്ഥാന ജനറല്‍ സെക്രട്ടറി കെ.പി.എ മജീദ്, എം.പി. അബ്ദുസമദ് സമദാനി, ഡോ.എം.കെ മുനീര്‍, സാദിഖലി ശിഹാബ് തങ്ങള്‍, വി.കെ ഇബ്രാഹിം കുഞ്ഞ് പങ്കെടുത്തു.