തിരൂര്‍: ഒഴൂര്‍ പഞ്ചായത്തിലെ എരനല്ലൂര്‍ അടിക്കുളം ചളിയും പായലും നീക്കി ഉപയോഗയോഗ്യമാക്കുന്നതിന് യുവാക്കളുടെ നേതൃത്വത്തില്‍ അഞ്ചുദിവസത്തെ ശ്രമദാന ക്യാംപിന് തുടക്കമായി. നെഹ്‌റു യുവ കേന്ദ്രയുടെയും എരനല്ലൂര്‍ വിവ ആര്‍ട്‌സ് ആന്‍ഡ് സ്‌പോര്‍ട്‌സ് ക്ലബിന്റെയും സംയുക്താഭിമുഖ്യത്തില്‍ തദ്ദേശവാസികളുടെയും താനൂര്‍  ബ്ലോക്കിലെ ഇതര യൂത്ത് ക്ലബുകളുടെയും പങ്കാളിത്തത്തിലാണ് ശ്രമദാനം.  ഏതാനും വര്‍ഷങ്ങള്‍ മുമ്പ് വരെ പൊതുആവശ്യങ്ങള്‍ക്കും കൃഷിക്കുമായി  സമീപവാസികള്‍ അടിക്കുളത്തെ ആശ്രയിച്ചിരുന്നു. ചളിയും പായലും മൂടിയതോടെ കുളം  മലിനമാകുകയും കൃഷിക്കും ദൈനംദിന ആവശ്യങ്ങള്‍ക്കും വെള്ളം കിട്ടാത്ത അവസ്ഥയുണ്ടാകുകയുമായിരുന്നു. അഞ്ചു ദിവസത്തെ ശ്രമദാനത്തിലൂടെ കുളത്തിലെ പായലും ചളിയും നീക്കി പരമാവധി ശുചീകരിക്കുകയാണ് ലക്ഷ്യം.
നെഹ്‌റു യുവ കേന്ദ്ര പ്രവര്‍ത്തകരും ജില്ലാ -ബ്ലോക്ക്-ഗ്രാമ പഞ്ചായത്ത് ജനപ്രധിനിധികളും യൂത്ത്ക്ലബ് മെമ്പര്‍മാരും തദ്ദേശ വാസികളും ശ്രമദാനത്തില്‍ പങ്കാളികളായി.
നാഷനല്‍ യൂത്ത് വളണ്ടിയമാരായ സക്കീര്‍ പൊന്മുണ്ടം, സി മുഹമ്മദ് ജൗഹര്‍, വിവ ആര്‍ട്‌സ് ആന്‍ഡ് സ്‌പോര്‍ട്‌സ് ക്ലബ് ഭാരവാഹികളായ സൈതലവി കളത്തില്‍, സിദ്ദീഖ് എന്‍.പി തുടങ്ങിയവരുടെ നേതൃത്വത്തിലാണ്  ശ്രമദാനം. 20 നു സമാപിക്കും.