തിരൂര്‍: ജലത്തിന്റെ പ്രാധാന്യം തിരിച്ചറിഞ്ഞ് ഉപയോഗം പരിമിതപ്പെടുത്തണമെന്ന് ഓര്‍മപ്പെടുത്തി തിരൂരില്‍ കുരുന്നു കുട്ടികള്‍ കൂട്ടത്തോടെ പട്ടം പറത്തി. ലോകജല ദിനത്തോടനുബന്ധിച്ച് തിരൂര്‍ ഫാത്തിമ മാത എല്‍.പി സ്‌കൂളിലെ നാലാം ക്ലാസ് വിദ്യാര്‍ഥികളാണ് നൂറ് പട്ടങ്ങള്‍ പറത്തിയത്. തിരൂര്‍ താഴെപ്പാലത്തെ നഗരസഭാ സ്‌റ്റേഡിയമാണ് വേറിട്ട പരിപാടിയ്ക്ക് വേദിയായത്.
ജലസംരക്ഷണ സന്ദേശങ്ങള്‍ എഴുതി കുട്ടികള്‍ സ്വയം തയാറാക്കിയ പട്ടങ്ങളാണ് ബോധവല്‍ക്കരണത്തിനായി ഉപയോഗിച്ചത്. ക്രീഡ കൈറ്റ് ക്ലബുമായി  സഹകരിച്ച് സ്‌കൂള്‍ പി.ടി.എയാണ് പട്ടം പറത്തല്‍ സംഘടിപ്പിച്ചത്.
പി.ടി.എ പ്രസിഡന്റ് മുജീബ് താനാളൂര്‍, വൈസ് പ്രസിഡന്റ് അഡ്വ. പി.എം സബീന, പ്രധാനധ്യാപിക സിസ്റ്റര്‍ നാന്‍സി ടോം, ക്രീഡ കൈറ്റ് ക്ലബ് പ്രസിഡന്റ് മിനി പി എസ് നായര്‍, ഒ രാഗേഷ്, ബബലു, ഇ.പി നാദിറ സംസാരിച്ചു.