കാബൂള്‍: അമേരിക്കന്‍ പ്രസിഡന്റ് ബരാക് ഒബാമയുടെ നിര്‍ദേശത്തെ തുടര്‍ന്ന് അഫ്ഗാന്‍ താലിബാനെതിരേ വ്യോമാക്രമണം തുടങ്ങി. തീവ്രവാദത്തിനെതിരേ പോരാട്ടം ശക്തമാക്കാന്‍ ഈ മാസം ആദ്യത്തിലാണ് ഒബാമ ഉത്തരവിട്ടിരുന്നത്. നിരന്തരമായുള്ള വ്യോമാക്രമണമാണ് അമേരിക്ക നടത്തുന്നതെന്നാണ് റിപ്പോര്‍ട്ടുകള്‍. 

തെക്കന്‍ അഫ്ഗാനില്‍ താലിബാനെ ലക്ഷ്യമിട്ട് കഴിഞ്ഞ ഞായറാഴ്ചയാണ് അമേരിക്ക വ്യോമാക്രമണം തുടങ്ങിയതെന്ന് അധികൃതര്‍ അറിയിച്ചു.
എന്നാല്‍ സംഭവത്തില്‍ കൂടുതല്‍ പ്രതികരിക്കാന്‍ പെന്റഗണ്‍ പ്രസ് സെക്രട്ടറി പീറ്റര്‍ കുക്ക് വിസമ്മതിച്ചു. സൈനിക നടപടിയെക്കുറിച്ച് പരസ്യമായി പ്രതികരിക്കുന്നതില്‍നിന്ന് ഉദ്യോഗസ്ഥരെ ഭരണകൂടം വിലക്കിയിട്ടുണ്ട്. എന്നാല്‍ അമേരിക്കന്‍ പിന്തുണയുള്ള അഫ്ഗാന്‍ സൈന്യം ആക്രമണം നടത്തുന്നുണ്ടെന്ന് ഒരു ഉന്നത ഉദ്യോഗസ്ഥന്‍ അറിയിച്ചു.