മലപ്പുറം: മലപ്പുറത്തെ കുട്ടികള്‍ക്ക് ഇംഗ്ലീഷ് ഫുട്‌ബോള്‍ ഇതിഹാസം ഡേവിഡ് ജെയിംസിന്റെ കീഴില്‍ കളിപഠിക്കാന്‍ അവസരമൊരുങ്ങുന്നു. കൊച്ചി ആസ്ഥാനമായ ഫുട്‌ബോള്‍ അക്കാദമിയായ സ്‌പോര്‍ട്ടിക്കോ വെന്‍ച്വേഴ്‌സാണ് ഡേവിഡ് ജയിംസിനെ മലപ്പുറത്തിന്റെ മണ്ണിലെത്തിക്കുന്നത്.
ആധുനിക സൗകര്യങ്ങളും വിദഗ്ധരായ വിദേശ കോച്ചുമാരുമടങ്ങുന്ന പദ്ധതിയാണ് അക്കാദമിയിലൂടെ ലക്ഷ്യമിടുന്നത്. ഇംഗ്ലണ്ടിനുവേണ്ടി അഞ്ഞൂറിലധികം തവണ ഗോള്‍വലയം കാത്ത ഡേവിഡ് ജെയിംസ് മാഞ്ചസ്റ്റര്‍ സിറ്റി അടക്കമുള്ള പ്രശസ്തരായ പ്രീമിയര്‍ ലീഗ് ക്ലബുകളുടെ വിശ്വസ്ഥ കാവല്‍ക്കാരനായിരുന്നു.
പ്രഥമ ഐ.എസ്.എല്ലില്‍ കേരളാ ബ്ലാസ്റ്റേഴ്‌സിനെ ഫൈനല്‍വരെ എത്തിച്ചിട്ടുള്ള ജെയിംസ് അന്നു ടീമിന്റെ സുപ്രധാന മത്സരങ്ങളില്‍ ഗോള്‍ ബാറിനു കീഴില്‍ നിര്‍ണായകമായ പ്രകടനങ്ങള്‍ കാഴ്ചവച്ചിരുന്നു. വിദേശ കോച്ചുമാരടക്കം ഒരു വലിയ സംഘംതന്നെ കൂടെയുണ്ടാകും.
എട്ടു മുതല്‍ പതിനാല് വയസുവരെയുള്ള കുട്ടികള്‍ക്കാണ് അക്കാദമിയില്‍ ചേരാന്‍ അവസരം. ഇതിനോടനുബന്ധിച്ചു മലപ്പുറത്തു വെക്കേഷനു സമ്മര്‍ ഫുട്‌ബോള്‍ ക്യാംപ് സംഘടിപ്പിച്ചിട്ടുണ്ട്.
വിദേശ കോച്ചിന്റെ കീഴില്‍ നടക്കുന്ന സമ്മര്‍ ക്യാംപിനും തുടര്‍ന്ന് അക്കാദമിയില്‍ ചേര്‍ന്നു കളി പഠിക്കാനും താല്‍പര്യമുള്ള കുട്ടികളില്‍നിന്ന് അപേക്ഷകള്‍ ക്ഷണിച്ചു. ഫോണ്‍: 7593052008.