ഡബ്ലിന്‍: പാക്കിസ്ഥാനെതിരേയുള്ള തങ്ങളുടെ പ്രഥമ ടെസ്റ്റ് ക്രിക്കറ്റില്‍ അയര്‍ലന്റിന് തോല്‍വി. അഞ്ചുവിക്കറ്റിനാണ് അയര്‍ലന്റ് സ്വന്തം നാട്ടില്‍ നടന്ന ടെസ്റ്റ് ക്രിക്കറ്റില്‍ തോറ്റത്. 160 റണ്‍സിന്റെ വിജയ ലക്ഷ്യവുമായി കളത്തിലിറങ്ങിയ പാക്കിസ്ഥാനെ വിറപ്പിച്ചാണ് അയര്‍ലന്റ് കീഴടങ്ങിയത്. 14 റണ്‍സിന് മൂന്ന് വിക്കറ്റ് എന്ന നിലയില്‍ തകര്‍ന്ന പാക്കിസ്ഥാനെ പിന്നീടെത്തിയ ഇമാമുല്‍ ഹഖ്, ബാബര്‍ അസം എന്നിവര്‍ ചേര്‍ന്നാണ് രക്ഷപ്പെടുത്തിയത്. നാലാം വിക്കറ്റില്‍ 126 റണ്‍സാണ് ഇരുവരും ചേര്‍ന്ന് അടിച്ചു കൂട്ടിയത്. 59 റണ്‍സിന് ബാബര്‍ അസം റണ്ണൗട്ടായെങ്കിലും ഇമാമുല്‍ ഹഖിന്റെ മികച്ച ബാറ്റിങ്ങാണ് വിജയത്തിന് തുണയായത്. ഇമാമുല്‍ ഹഖ് 74 റണ്‍സ് നേടി പുറത്താകാതെ നിന്നു. അഞ്ച് വിക്കറ്റുകളുടെ നഷ്ടത്തിലാണ് പാക്കിസ്ഥാന്‍ വിജയലക്ഷ്യം മറികടന്നത്. അയര്‍ലന്റിന് വേണ്ടി ടീം മുര്‍ട്ഗ രണ്ടും ബോയഡ് റാങ്കിന്‍, സ്റ്റുവര്‍ട്ട് തോംപ്‌സണ്‍ എന്നിവര്‍ ഓരോ വിക്കറ്റ് വീതവും വീഴ്ത്തി. രണ്ടാം ഇന്നിങ്‌സില്‍ ഏഴു വിക്കറ്റിന് 319 റണ്‍സ് എന്ന നിലയില്‍ ബാറ്റിങ് പുനരാരംഭിച്ച അയര്‍ലന്റ് 20 റണ്‍സ് കൂട്ടിച്ചേര്‍ത്ത് ഓള്‍ ഔട്ടാവുകയായിരുന്നു. പാക്ക് ബൗളിങ്ങ് നിരയില്‍ അഞ്ചു വിക്കറ്റുമായി മുഹമ്മദ് അബ്ബാസ് തിളങ്ങി. മത്സരത്തില്‍ അബ്ബാസ് ഒമ്പത് വിക്കറ്റ് നേടി.