എഡ്ജ്ബാസ്റ്റന്‍: ശ്രീലങ്കയ്‌ക്കെതിരായ രണ്ടാം ഏകദിന മത്സരത്തില്‍ ഇംഗ്ലണ്ടിന് തകര്‍പ്പന്‍ ജയം. ശ്രീലങ്ക ഉയര്‍ത്തിയ 255 റണ്‍സ് പിന്തുടര്‍ന്ന ഇംഗ്ലണ്ട് വിക്കറ്റ് നഷ്ടമില്ലാതെ ലക്ഷ്യം കാണുകയായിരുന്നു. ഇംഗ്ലണ്ടിനായി ജേസന്‍ റോയ്(112*) അലക്‌സ് ഹെയ്ല്‍സ്(133*) എന്നിവര്‍ സെഞ്ച്വറി നേടി. ശ്രീലങ്കയുടെ ഭേദപ്പെട്ട സ്‌കോര്‍ വെല്ലുവിളിയല്ലെന്ന് രീതിയിലാണ് ഇംഗ്ലീഷ് ഓപ്പണര്‍മാര്‍ ബാറ്റുവീശിയത്. ലങ്കയുടെ ബൗളര്‍മാരെല്ലാം നന്നായി തല്ലുവാങ്ങി. 

ജേസന്‍ റോയ് 95 പന്തില്‍ ഏഴു ബൗണ്ടറിയും നാലു സിക്‌സറുമടിച്ചപ്പോള്‍ ഹെയ്ല്‍സ് 133 പന്തില്‍ 10 ബൗണ്ടറിയും ആറു സിക്‌സറും പറത്തി. ജയത്തോടെ പരമ്പരയില്‍ 1- 0ന് മുന്നിലെത്താനും ഇംഗ്ലണ്ടിന് സാധിച്ചു. ആദ്യ മത്സരം സമനിലയായിരുന്നു.
നേരത്തെ ടോസ് നേടിയ ശ്രീലങ്ക ബാറ്റിങ് തെരഞ്ഞെടുക്കുകയായിരുന്നു. ദിനേഷ് ചാണ്ഡിമല്‍(52) ഉപുല്‍ തരംഗ(53*) എഞ്ചലോ മാത്യൂസ്(44) എന്നിവരുടെ പ്രകടനമാണ് ലങ്കയ്ക്ക് ഭേദപ്പെട്ട സ്‌കോര്‍ സമ്മാനിച്ചത്. കുശാല്‍ പെരേര(37) ഗുണതിലക(22) എന്നിവരും നന്നായി ബാറ്റ് ചെയ്തു. രണ്ടു വിക്കറ്റ് വീതം വീഴ്ത്തിയ ലിയാം പ്ലങ്കറ്റ്, ആദില്‍ റഷീദ് എന്നിവര്‍ രണ്ടു വിക്കറ്റെടുത്തു ലങ്കയുടെ കുതിപ്പ് തടയുകയായിരുന്നു.