പാരിസ്: പ്രീ ക്വാര്‍ട്ടറിലെ ആദ്യ മത്സരത്തില്‍ സ്വിറ്റ്‌സര്‍ലന്‍ഡിനെ ഷൂട്ടൗട്ടില്‍ വീഴ്ത്തി പോളണ്ട് യൂറോ കപ്പിന്റെ ക്വാര്‍ട്ടറില്‍ കടന്നു. ആദ്യമായിട്ടാണ് പോളണ്ട് യൂറോ കപ്പിന്റെ ക്വാര്‍ട്ടറില്‍ കടക്കുന്നത്. നിശ്ചിത സമയത്ത് ഇരുടീമുകളും ഓരോ ഗോള്‍ വീതം നേടിയ സമനിലയായതിനെ തുടര്‍ന്ന് കളി അധിക സമയത്തേക്ക് നീണ്ടു. എന്നാല്‍ അധിക സമയത്തും സമനില പാലിച്ചതിനാല്‍ മത്സരം ഷൂട്ടൗട്ടിലേക്ക് നീളുകയായിരുന്നു.

5-4 എന്ന സ്‌കോറിനാണ് പോളണ്ട് ഷൂട്ടൗട്ടില്‍ വിജയിച്ചത്. പോളണ്ടിനായി കിക്കെടുത്ത റോബര്‍ട്ട് ലെവന്‍ഡോസ്‌കി, മിലിക്, ഗ്ലിക്, ബ്ലാസിക്കോവ്‌സ്‌കി, ക്രൈച്ചോവിയാക്, എന്നിവര്‍ ലക്ഷ്യം കണ്ടപ്പോള്‍ സ്വിസ് താരം ഷാക്കയുടെ നിര്‍ണായക ഷോട്ട് പുറത്തേക്ക് പോയി. ലിച്ചന്‍സ്‌റ്റെയ്‌നര്‍, ഷാഖിരി, ഷാര്‍, റോഡ്രിഗസ് എന്നിവര്‍ സ്വിറ്റ്‌സര്‍ലന്‍ഡിനായി ലക്ഷ്യം കണ്ടു.
പോളണ്ടാണ് മത്സരത്തിന്റെ തുടക്കത്തില്‍ ആധിപത്യം പുലര്‍ത്തിയത്. റോബര്‍ട്ട് ലെവന്‍ഡോവ്‌സ്‌കി നടത്തിയ തകര്‍പ്പനൊരു മുന്നേറ്റത്തില്‍ പോളണ്ട് അക്കൗണ്ട് തുറക്കുമെന്ന് കരുതിയെങ്കിലും സ്വിസ് ഗോളി സോമേഴ്‌സ് ഷോട്ട് സേവ് ചെയ്തു. ക്രൈചോവിയാക്, ഗ്രോസിക്ക് എന്നിവര്‍ ലക്ഷ്യം നേടുമെന്ന് കരുതിയെങ്കിലും ഷോട്ട് പുറത്തേക്ക് പോവുകയായിരുന്നു.39ാം മിനുട്ടില്‍ ബ്ലാസിക്കോവ്‌സ്‌കി പോളണ്ടിന്റെ അക്കൗണ്ട് തുറന്നു. ഗ്രോസിക്കിയുടെ പാസില്‍ നിന്നായിരുന്നു ഗോള്‍.
ഈ ഗോളില്‍ പോളണ്ട് ജയിക്കുമെന്ന് കരുതിയെങ്കിലും 82ാം മിനുട്ടില്‍ ഷാഖിരിയുടെ തകര്‍പ്പനൊരു ബൈസിക്കിള്‍ കിക്ക് ഗോള്‍ സ്‌കോര്‍ തുല്യതയിലാക്കുകയായിരുന്നു.