കൊണ്ടോട്ടി: സംസ്ഥാന ഹജ്ജ് നറുക്കെടുപ്പ് ഇന്നു കരിപ്പൂര്‍ ഹജ്ജ് ഹൗസില്‍ നടക്കും. രാവിലെ 11നാണ് നറുക്കെടുപ്പ്. കേരളത്തിനു ലഭിച്ച മൊത്തം ക്വാട്ട 11197 ആണ്. ഇതില്‍ എഴുപത് വയസ് വിഭാഗത്തിലും അഞ്ചാം വര്‍ഷ വിഭാഗത്തിലും അപേക്ഷ സമര്‍പ്പിച്ച മുഴുവന്‍ അപേക്ഷകരെയും  (10830 പേര്‍) നറുക്കെടുപ്പില്ലാതെ തിരഞ്ഞെടുക്കും. ബാക്കി വരുന്ന 367 സീറ്റിലേക്കാണ് ആദ്യം നറുക്കെടുപ്പ്. നാലാം വര്‍ഷക്കാരില്‍ നിന്നുമാണ് ഇവരെ കണ്ടെത്തുക. പിന്നീട് വെയ്റ്റിങ് ലിസ്റ്റ് പട്ടിക പ്രസിദ്ധീകരിക്കും. രണ്ടു വെയിറ്റിങ് ലിസ്റ്റുകളാകും തയാറാക്കുക. കൂടുതല്‍ ഹജ്ജ് സീറ്റുകള്‍ ലഭിക്കുന്ന മുറയ്ക്ക് ആദ്യ വെയ്റ്റിങ് ലിസ്റ്റില്‍ നിന്ന് മുന്‍ഗണന പ്രകാരം തീര്‍ഥാടകര്‍ക്ക് അവസരം നല്‍കും.
  പൂര്‍ണമായും കേന്ദ്ര ഹജ്ജ് കമ്മിറ്റി ഓഫിസിന്റെ നിയന്ത്രണത്തിലാണ് നറുക്കെടുപ്പ് നടക്കുന്നത്. ഇതിനായി മുംബൈയിലെ കേന്ദ്ര ഹജ്ജ് കമ്മിറ്റിയുടെ ഓഫിസ് വെബ്‌സൈറ്റും കരിപ്പൂര്‍ ഹജ്ജ് ഹൗസിലെ സൈറ്റും ബന്ധിപ്പിച്ചിട്ടുണ്ട്. നറുക്കെടുപ്പില്‍ അവസരം ലഭിക്കുന്നവരുടെ കവര്‍ നമ്പറുകളും ഹജ്ജ് ഹൗസിലെ സ്‌ക്രീനില്‍ തെളിയും.
മുന്‍ വര്‍ഷത്തേക്കാളും ഹജ്ജ് സീറ്റുകളാണ് ഇത്തവണ കേരളത്തിനു ലഭിച്ചത്. കഴിഞ്ഞ വര്‍ഷം നറുക്കെടുപ്പില്‍ വെയ്റ്റിങ് ലിസ്റ്റു മാത്രമാണ് പ്രസിദ്ധീകരിച്ചിരുന്നത്. 14000 പേരാണ് ഈ വര്‍ഷം നാലാം വര്‍ഷക്കാരായുള്ളത്. ഹജ്ജ് കമ്മിറ്റി ചെയര്‍മാന്‍ തൊടിയൂര്‍ മുഹമ്മദ് കുഞ്ഞി മൗലവി, ഹജ്ജ് സെക്രട്ടറിയും മലപ്പുറം ജില്ലാ കലക്ടറുമായ അമിത് മീണ സംബന്ധിക്കും.