ചങ്ങരംകുളം: ചെറവല്ലൂര്‍ കിഴക്കുമുറിയിലെ പൂവങ്കര കബീറിന്റെ മകന്‍ മുഹമ്മദ് നജീബിന് നാലു മാസം കാത്തിരുന്നപ്പോള്‍ കിട്ടിയത് നാല് ആധാര്‍ കാര്‍ഡ്. നാലു വയസുകാരനായ മകനെ സ്‌കൂളില്‍ ചേര്‍ക്കാന്‍ ആധാര്‍ കാര്‍ഡ് ആവശ്യം വന്നതിനാലാണ് നാല് മാസം മുമ്പ് അക്ഷയ സെന്ററില്‍ കബീര്‍ ആധാറിനായി കുട്ടിയുടെ ഫോട്ടോയും രേഖകളും സമര്‍പ്പിച്ചത്.
ദിവസങ്ങള്‍ക്കകം തപാല്‍ വഴി ആധാര്‍ കാര്‍ഡ് എത്തുമെന്നായിരുന്നു അക്ഷയ ജീവനക്കാര്‍ പറഞ്ഞത്. എന്നാല്‍ മാസങ്ങള്‍ കഴിഞ്ഞും കാര്‍ഡ് എത്തിയില്ല. പല തവണ അക്ഷയ സെന്ററിലും, ഉദ്യോഗസ്ഥ തലത്തിലും പരാതിപ്പെട്ടിരുന്നു.
ഇങ്ങനെ ഇരിക്കെയാണ് കഴിഞ്ഞ ദിവസം പോസ്റ്റുമാന്‍ ആധാര്‍ കാര്‍ഡുമായി വന്നത്.
നാല് കവറുകള്‍ കണ്ടപ്പോള്‍ മറ്റ് അംഗങ്ങളുടേയും കാര്‍ഡ് ആയിരിക്കും എന്നാണ് കരുതിയത്. കവര്‍ തുറന്നപ്പോഴാണ് നാലെണ്ണവും മുഹമ്മദ് നജീബിന്റേതാണെന്ന് അറിഞ്ഞത്.
വ്യത്യസ്ത നമ്പറുകളാണെങ്കിലും പേരും വിലാസവും ഫോട്ടോയും കുട്ടിയുടേത് തന്നെ. പല നമ്പറില്‍ ആധാര്‍ കാര്‍ഡ് ലഭിച്ചതിനാല്‍  കാര്‍ഡുകള്‍ തിരിച്ച് അയക്കാനുള്ള തയാറെടുപ്പിലാണ് വീട്ടുകാര്‍.